每位在職媽媽都試過，每次放完假番工，小朋友都總會喊住唔捨得媽咪走，所以我已經預咗星期一出門口前，寶貝女實喊，但係竟然冇喎，最奇怪嘅，係隔咗一日，星期二先黎喊。 由於爸爸放完假，工作堆積如山，星期一晚又做到好夜番唔到屋企，所以我就邀請寶貝女嚟同我一齊瞓。到星期二朝早，我一早就起身梳洗、換衫、化粧，化完粧趁仲有少少時間就入房睇吓，點知佢一醒就用個好慘嘅眼神望住我，話：「媽咪你陪我瞓啦！」 「有呀！我有陪你瞓呀！不過我早少少起身準備番工之嘛！」 「都唔同！我起身都見唔到你！」 哦！原來寶貝女鐘意，一醒咗睜開眼見到媽咪喺張床嗰度！難怪嘅，成個郵輪假期，我哋一家三口瞓埋一齊，每朝早都係寶貝女叫醒媽咪話要食早餐，可能佢同媽咪一樣，好鐘意睇住大家瞓著覺嗰個樣啦！ 雖然之前都講過，寶貝女久唔久都會扭我計，唔俾我出門口，但係今次超勁，仲不斷攬實我唔俾我走，又要我抱又要我錫，講一大輪道理都唔掂，要工人姐姐抱走佢我先走到，搞到我足足遲咗20分鐘呀！ 其實我知道，我出門口冇耐佢就會收聲，夜晚番到屋企會好似平時一樣咁開心，但係講到尾，寶貝女都係想媽咪陪佢多啲啫，所以我一收工就衝番屋企，見佢食完飯就建議：「不如我哋落Seven買雪糕？」寶貝女話：「不如買珍寶珠？」「都好喎！」（心諗，仲好，平好多，況且兩、三個月先一粒珍寶珠，都唔算多啦！）跟住我哋就手拖手落街買珍寶珠，幸福到呢．．．
