我之前成日都講，我好鼓勵寶貝女用說話表達自己，但係細個嗰陣都未有個詞彙，點講呢？就好似發洩情緒咁，小朋友都未識講話「我好失望」，所以只好用喊或者大嗌嚟表達。 Lee本叫「菲力的17種情緒」嘅實用書，我一睇就覺得好鐘意，不禁問咗一句：點解唔早啲俾我見到呀？ 書入面以菲力嘅生活例子，演繹咗17種小朋友最常見嘅情緒，例如：開心、失望、生氣、嫉妒、害羞等等。演繹每種情緒嘅時候，首先會有一個菲力嘅小故事，跟住又幾個會引發相關情緒嘅例子，最後，亦係我最鐘意嗰part，就係佢會仔細形容菲力有嗰種情緒嗰陣嘅表情同行為，畫得好細緻，好得意架！ 好似「菲力生氣了」lee一部份，講爸爸拎咗菲力最鐘意嘅公仔皮皮去洗呀，菲力好嬲，不過睇住皮皮喺洗衣機入面玩又幾開心架喎！而菲力生氣嘅表情實在太得意喇：會「賭氣」、「臉色難看」、「瞪人」、「大哭大叫」，寶貝女睇完之後都問：「我嬲嗰陣係咪咁架？」 而「好奇的菲力」就講咗有好奇心嘅小朋友都好鐘意觀察，而觀察嘅時候，都會好專心，仲會瞪大隻眼去睇野架！ 雖然4歲嘅寶貝女大概都明白lee啲情緒係咩，除咗認識情緒，媽咪仲可以點樣運用lee本書呢？我準備叫寶貝女細心留意吓身邊嘅小朋友，當佢哋有某個表情或者行為嘅時候，估吓佢哋有咩情緒，從而作出適當嘅回應，生氣嘅了解同安慰、好奇嘅一齊發掘新事物、害羞嘅鼓勵、開心嘅一同分享，多啲了解人、了解自己，做個人見人愛嘅小朋友。
