去得台灣，唔少得去書店打吓書釘，好可惜落船嘅時間太短，做得lee樣又做唔到嗰樣。但係好在，出發前已經做咗少少資料搜集，香港買到嘅書，喺台灣買平大概20%，搬番嚟都抵。 不得不介紹吓嘅，係「我的第一套好好吃的食育繪本」系列。 顧名思義lee套係一套講食嘅書，主角小奈奈有個好叻煮飯嘅嫲嫲，會煮營養豐富嘅食物俾小奈奈食之餘，仲會教佢煮唔同類型嘅食物，好可愛呀！但係由於作者係日本人，故事入面用嘅材料，好多都係日本人常用嘅，例如吻仔魚、海帶、柴魚乾等等，我哋少接觸啲，所以要花多少少時間解釋喇！ 除咗小奈奈同嫲嫲，書入面仲有4個小精靈，分別代表每餐都需要嘅唔同種類有營食物，每當故事入面要煮嘢食嘅時候，相關嘅小精靈都會出嚟幫手，好得意架！我已經叫寶貝女記住佢哋，睇吓我哋平時食飯係唔係齊晒4個小精靈，咁生活化嘅故事書，我哋最鐘意架！ Lee套書唔單止內容生活化，仲好實用添！因為嫲嫲同小奈奈煮嘅嘢食，真係煮到出嚟，故事後面仲有食譜添呀，啱晒一啲鐘意親子烹飪嘅家庭。由於佢嘅煮法真係好簡單，吸引埋我lee個唔多鐘意下廚嘅媽咪去試吓添呀！ 圖畫同內容都咁吸引，睇完一本已經確定可以買晒一套，當然香港都有得賣啦！ http://www.cp1897.com.hk/product_info.php?BookId=4717211016244
