搭郵輪最好嘅地方，就係travel嘅時間都可以keep住玩，唔會浪費喺架飛機上面，有得睇魔術表演同歌舞，有兩個游泳池，仲有兒童樂園玩波波池同打機，節目都幾精彩豐富架！ 出發後嘅第一個朝早，食完早餐已經差唔多10點， 我哋喺郵輪上周圍行，行到兒童樂園嘅時候，寶貝女當然唔捨得走，梗係啦，波波池喎，上船前已經喺網頁睇過，勁期待，咁啱小朋友泳池就喺旁邊，我又帶寶貝女 出去睇吓，唔知係咪太曬定係太多人，平時成日話要去游水嘅寶貝女，最尾都係揀咗玩波波池，媽咪當然奉陪，佢開心咪得囉！ 玩咗一個鐘之後，諗住番房抖陣就食lunch，點知寶貝女話：「媽咪我想游水！」媽咪好耐心同寶貝女解釋：「而家就嚟食lunch，唔夠時間喇，食完番嚟要瞓一陣，因為4點要出去玩，可能會玩得夜少少，所以要抖足精神呀！」 佢一而再，再而三嘅堅持，固執又唔聽解釋，媽咪只好又講：「記唔記得投先我都有問你想游水定玩波波池呀？你揀咗波波池就冇時間游水喇。或者下次你做選擇之前諗清楚先啦！」 點解我咁堅持唔讓步？ ~就快到lunchtime，餓住唔可以游水架啵 ~lunch之後要瞓覺，如果唔瞓覺，嗰晚嘅行程就會亂晒，又或者要帶住個唔夠瞓、發脾氣嘅小朋友行夜市，又或者要抱住行，點都冇so ~既然做得選擇，當然要承擔後果，既然lee個後果唔係咩嚴重嘢，承擔吓冇壞嘅 Lunchtime前後，寶貝女斷斷續續都扭咗好多次要游水，但係媽咪嗲哋都冇心軟（係我哋心腸太硬嗎？），堅持原有計劃，為嘅只係希望佢做選擇時要思考，時間過咗去真係冇得番轉頭，有咩結果，都會影響自己，需要自己承擔。 回想番，我都應該喺佢做選擇嘅時候多啲同佢分析，等佢明白做咗lee兩個選擇之後有咩結果會仲好。可能自己都覺得有不足嘅地方啦，所以我哋將行夜市嘅行程縮短少少，俾咗個驚喜嘅安排俾佢~~游夜水！哈哈！
