[20/8/2014] 暑期班老師打電話嚟：「Courtney媽咪，Courtney lee幾日成日話你哋去台灣旅行，聽日同後日唔番學，星期六先番嚟喎。」媽咪超唔好意思：「係呀！我哋去旅行呀，諗住今日接放學先同你請假添！哈哈，估唔到暑期班都咁認真！」(乜寶貝女上堂講咁多嘢呀?!） 升k2嘅寶貝女咁清楚咁交代到我哋嘅行程俾老師聽，我都覺得幾驚喜，好彩自己努力睇育兒書，學識咗要鼓勵小朋友表達。 自寶貝女細個，我都好鼓勵佢表達自己，媽咪每日都拋啲問題俾佢，等我知佢發生咩事之餘，又可以鼓勵吓佢講嘢。其實，有時有啲已知嘅嘢，反而我更加會問，好似以前番N班咁，通告一早寫咗會一齊試一種食物，我一番屋企通常會扮唔知，問吓佢：「今日喺學校係唔係試咗啲好好味嘅嘢呢？咩嚟架？點嘅樣架？你鐘唔鐘意呢？」睇吓寶貝女點表達；如果講唔到，先慢慢引導佢講，等佢講吓個過程，同時講吓感受。到而家大個少少，有時我哋會講多啲資料性嘅嘢俾寶貝女聽，又問吓佢嘅意見，希望佢講吓原因，多啲思考同表達。 就好似今次去旅行咁，我哋選擇咗搭郵輪，計劃其間，我同嗲哋俾好多唔同嘅資料俾佢睇，睇吓佢有冇興趣去；首先我哋同佢一齊上網睇吓隻船啦，又睇吓我哋會住嘅房，又睇船上嘅設施，跟住媽咪又問啲open questions喇，例如：你喺船上面最想做咩呀？想游水嘅話你要準備啲咩呢？我哋星期三就出發，星期六先番，咁你有幾多日冇得番暑期班呀？星期四你要去旅行，暑期班去snoopyland喎你冇得參加喎，會唔會覺得可惜？。。。過程中好多問答，唔單止增加咗寶貝女對今次郵輪假期嘅期望，多啲提多啲講，更令佢對lee件事認識更深，更容易清晰表達。 雖然香港lee幾日落雨，但係無損寶貝女對郵輪假期嘅期望：「落雨都可以好好玩嘅啫！」寶貝女嘅正面思維，媽咪最鐘意！
