星期日發生咗一件事，不得不記低佢，值得記低嘅，唔單止係寶貝女嘅好行為，仲要讚吓自己同佢嘅細心溝通。 每次番完主日學，老師都會同小朋友分享小食或者小禮物，今日見寶貝女空手行出黎，我都不以為意。行去搭巴士嗰陣，佢話想要公主貼紙，我就問佢：「點解想要公主貼紙呀？屋企都有，夠就得啦！」但係佢不斷同我講：「未夠架！」我都只係以為佢肚餓，搵嘢黎扭計。 去到巴士站等車嗰陣，見寶貝女嘅面口唔係好對路，我又問：「點解你咁想要公主貼紙呀？係咪見到朋友仔有呢？」原來，老師今日派嘅小禮物，係迪士尼貼紙，當然啲貼紙唔會張張都一樣啦，有公主、維尼、巴斯光年，唐老鴨等等，而寶貝女收到嘅，係米奇。由於佢好鐘意公主，佢就問其他小朋友可唔可以交換，點知冇人肯喎，唯有將張米奇貼紙放低就走。 我聽完之後，心裡面十分感動，感動到即刻攬住佢安慰佢。lee個小朋友好乖喎，雖然冇收到鐘意嘅公主貼紙，心入面有幾唔開心都好，都冇發脾氣，又冇同人哋爭，好抵錫喎！跟住我仲用手指公喺佢嘅面珠仔度俾咗兩個叻俾佢添！（但係為咗張貼紙都咁唔開心，lee種性格有排改呀……） 唔發脾氣、唔爭嘢，咁就要讚？ 係架！既然寶貝女做得啱，點解唔讚吓佢，鞏固佢lee種做法呢？俾小朋友一個肯定，做啱就讚，做錯就改，佢哋就知道邊個係正確嘅方向。自小打好基礎，希望減低大個走歪路嘅機會啦！
