教小朋友有同理心，可以令佢關心世界大小事，嘗試明白人哋嘅感受，但係父母係佢哋最親嘅人，當然都要關心埋我哋啦，我成日都希望寶貝女會明白我哋，所以我講好多我哋嘅感受俾佢聽。 寶貝女好鐘意去一間餐廳食蕃茄烏冬，差唔多隔個禮拜就去，但係爸爸喺大陸做嘢，有時幾日先番屋企一次，所以每一次番嚟香港，出街食飯都想食得好啲，佢最唔鐘意，亦都係lee間餐廳；兩父女意見不合，爸爸有時會話：「咁我哋分開食啦！」最快搞得掂嘅嗰句當然係：「冇得你揀，小朋友梗係要聽大人話架啦！」喜歡講道理嘅媽咪，都覺得應該就吓爸爸（因為爸爸平時冇啖好食），我都好希望寶貝女明白我哋嘅諗法，我會同佢解釋： 「爸爸番工好辛苦喎，點解佢要咁做呀？因為佢錫我哋囉！你知唔知呀，爸爸平時番工真係好忙架，做嘢要做好耐，有時做到冇時間食飯，餓住個肚仔添呀！而且呢，爸爸公司附近又冇啲好味嘅嘢食喎，番到黎又要食啲唔鐘意食嘅嘢，你估佢開唔開心？我知你好想食蕃茄烏冬，不過我哋食日都有得食，唔駛一定揀今日架嘛，但係我哋好少陪爸爸飲茶，所以媽咪都覺得今日應該要飲茶喎！」 要寶貝女明白，當然要用佢明白嘅說話啦，而且，要講清楚背後嘅原因，加上爸爸嘅感受；但係寶貝女都希望媽咪明白佢架喎，所以我要講出黎；最後加埋媽咪嘅立場，好多時，寶貝女咁就俾我說服咗。其實小朋友都可以好易話為架，只要我哋俾多啲心機同佢解釋，慢慢就培養出一個明白事理嘅小朋友架喇！ 有一次我好夜收工，勁攰，由於爸爸唔番，我問寶貝女：「今晚瞓唔瞓媽咪床呀？」佢答我：「我今晚瞓自己床就得喇，我想媽咪抖吓，唔想夜晚踢親你。」媽咪冧到暈呀！！
