早兩個月掛紅雨嘅時候，同事們不約而同都希望落勁啲，快啲轉黑雨，當然，事與願違；我哋係唔係都想小朋友有同一樣嘅思維呢？ 其實明白嘅，大家都係想早啲收工，早啲番去見吓自己嘅小朋友啫，有咩唔啱呢？但係lee種思維，就好似個世界圍住佢轉咁，淨係諗自己，冇諗吓人哋喎！所以我會把握好多lee啲機會，同寶貝女講，每件事後面其他人可能受緊嘅影響，希望藉此建立寶貝女嘅同理心，等佢唔好淨係諗自己，學習啲關心身邊嘅人。 好似每次有8號風球、黑雨lee啲情況，雖然寶貝女仲細，未開始唔鐘意番學，但係我都會開電視俾佢睇吓新聞，然後我會同佢講吓大雨造成嘅影響，同時講吓受影響嘅人嘅感受，例如： 「慘喇，農夫辛苦種嘅農作物俾水浸晒喇，佢哋一定好唔開心，又要買種子種過喇！」 「你睇吓！個叔叔間屋浸晒水，可能啲電器浸壞咗唔用得喇！」 「嘩！好大風吹跌咗棵樹呀，希望冇人喺樹下面，冇人受傷啦！」 又例如見到救護車，或者見到有交通意外嘅時候，我會同寶貝女估計吓救護車出動嘅原因，可能係有人受傷，希望醫生加油醫治受傷嘅人，受傷嘅人快啲好番。 記得早前又一城漏水事件，搞到好似睇水舞間咁，我show咗幾張同事forward出黎嘅相俾寶貝女睇，其中一張，係影住啲水流落去一個護膚品counter度，寶貝女即刻話：「希望賣嘢嘅姐姐唔好浸親啦！」雖然佢唔明白嗰啲流落去嘅水係唔會浸親一個人，但係佢識得咁諗，我已經十級滿意喇！
