同事有個兩歲嘅仔仔，有一日佢問我：「我個仔好寸，對住我講嘢好唔客氣，都唔知喺邊度學番黎，你話點教好呀？」 兩歲仔未番學，寸人lee啲嘢，應該唔會喺出面學架啦，而且小朋友又跟婆婆住，婆婆溫柔謙厚，點都唔會教個小朋友寸人，十分認同身教嘅我，第一個反應係：「係咪你成日喺你個仔面前寸你阿媽呀？」佢無言．．． 小朋友做錯事、態度唔正確嗰陣，做父母嘅有時都會心急想鬧、想糾正，但係如果先了解原因，發現係一啲我哋可以控制到嘅嘢，咁咪可以確保問題可以根治囉？例如，係咪我教得唔好？係咪我冇做好榜樣？究竟lee種係唔係我平時對人嘅態度，所以小朋友學咗我啲衰嘢？如果真係自己嘅問題，我應該開心先係，因為我可以透過改變自己，教番啱個女。 星期日婆婆同寶貝女喺屋企睇女排，婆婆將排球嘅英文讀成「wally-ball」，寶貝女忍唔住要教婆婆正確嘅發音，唔係「wally-ball」，係「vollyball」！笑死我！不過好明顯係我平時寸阿婆啲英文寸得太多！阿媽，我會收斂吓架喇！ 其實，lee件事都可以好正面嘅，因為小朋友會學我哋嘅衰嘢，同時都會學我哋嘅好嘢架嘛，見到小朋友一啲好好嘅行為，我又會好自豪咁諗：「梗係我平時都係咁做，所以佢都學到！」 有一日我哋一家三口去茶餐廳食早餐，等咗好耐啲早餐都未到，我同個侍應講：「好耐架喇喎，人地遲過我哋叫都黎晒，你快啲幫我跟吓啦！」侍應走咗之後，寶貝女同我講：「媽咪，你要俾啲patience架嘛！」跟住爸爸咪笑到停唔到囉！不過我認，我平時都係咁叫寶貝女等緊嘅時候要有耐性嘅，佢話得我啱！ 身教嘅重要性毋用置疑，但係從小朋友身上發現到自己都有問題，一齊去改，咁唔係仲好咩？
