有關小朋友自尊心嘅育兒親子書都睇過唔少，但係真真正正感受到嘅只有一次，但係lee一次，足夠我以後都記住。 話說有一日出街，我哋去咗supermarket買咗一杯切好嘅水果，之後去到一個珠寶品牌喺銅鑼灣嘅服務中心，諗住坐低慢慢食，點知寶貝女放低嗰杯水果嘅時候，一不留神，成杯倒晒落地！由於寶貝女唔係刻意倒落地，又唔係因為頑皮，只係唔小心，所以媽咪冇鬧，只係話俾佢聽，今次跌咗啲水果冇得食喇，下次要小心，我哋而家幫手執乾淨啦！ 寶貝女當然好唔開心，嗰杯都係佢最鐘意食嘅水果，但係冇辦法，只好乖乖坐低休息，飲吓水就算；服務中心有個姐姐剛剛從後勤地方走出黎，見到佢咁唔開心，就問：「妹妹做咩唔開心呀？」寶貝女冇回應，我就話俾lee個姐姐聽：「佢唔小心跌左水果冇得食呀，所以唔開心囉！」lee個姐姐就真係好到不得了，即刻切咗個蘋果俾寶貝女，寶貝女又驚又喜，我都好感謝lee個姐姐咁貼心嘅服務。 關鍵嘅時候嚟喇！晚飯嘅時候，寶貝女突然問我：「點解你投先同姐姐講我跌水果嘅？」佢咁問，我都覺得好愕然：「姐姐見你唔開心，想關心你呀嘛，所以我就話俾姐姐聽囉！」寶貝女話：「但係我唔想喎！」 睇育兒書都睇過，父母尊重小朋友嘅自尊心非常重要，令小朋友知道父母尊重自己，以後就唔怕同父母溝通，所以媽咪嘅反應係：「係唔係你唔鐘意俾人知道你“論盡豬”呢？！好啦，咁如果你下次再唔小心嘅話，媽咪淨係提醒你，唔同人地講啦，好冇？」我得到寶貝女微笑加點頭示意。 Lee件事上面，除咗俾我明白到小朋友都要面子，都要尊重，更重要嘅係，睇育兒書真係好緊要，如果唔係睇過有關嘅題目，我俾寶貝女嘅反應會唔會一樣呢？可能我就會白白錯失咗同寶貝女建立信任關係嘅機會，所以「生命工程」lee個topic，真係有排學架！
