琴日寶貝女睇完啲書，擺到周圍都係，媽咪梗係要提醒佢要執嘢啦，但係佢竟然同我講：「公主唔駛執嘢架喎！」 嘩！媽咪從來都冇咁講過喎，佢喺邊度聽番嚟架？趁媽咪啲火未著之前，又係時候講道理。 媽：邊有公主唔執嘢架？ 女：cinderella囉！ 媽：吓？cinderella又要幫step mother 同step sisters煮飯洗衫抹地，做咁多家務，又點會唔執嘢呀！ 女：Aurora呢？ 媽：佢同good fairies一齊住喺森林，都要幫手berry picking，喺屋企一定好乖幫手啦！ 女：咁snow white呢？ 媽：snow white執嘢一定好叻啦，佢一去到小矮人屋企，見到亂糟糟就幫佢哋執喇喎。 女：咁Rapunzel呢？ 媽：Rapunzel俾Mother Gothel困住，都冇人幫到佢，佢一定係好叻自己照顧自己，又會執嘢又會清潔，如果唔係，間房一定污糟爉塌啦！ 可能寶貝女發覺唔夠媽咪講，又或者係真係明白做公主都要自己執嘢啦，就乖乖地自己走去收拾佢嘅殘局！ 可能好多媽咪會擔心，小朋友鐘意迪士尼公主，好容易會有公主病，但係迪士尼創作卡通咁耐，總會帶出好多正面信息，等媽咪多角度同小朋友解釋同運用。平日，我對於公主嘅演繹，不外乎「斯文」、「有儀態」、「善良」等等，琴日我嘅急才顯示，公主其實都好勤力架！（好彩佢冇問我Frozen個Queen Elsa駛唔駛做家務唧！ 好開心主日學嘅老師讚寶貝女係一個「乖巧、有儀態、冇公主脾氣嘅小公主」，俾我知道，其實，俾寶貝女接觸迪士尼公主，都唔算係一件壞事呀！
