小朋友鐘唔鐘意睇書，除咗係同佢個人興趣有關之外，媽咪幫手營造嘅環境同氣氛，都可能佔一定嘅重要性，我幫自己做咗個小小嘅總結： 1. 合適嘅閱讀環境 有時小朋友揀玩具，都會貪方便，啲玩具收埋咗，好多時就唔記得，唔拎出黎玩；其實睇書都係一樣啫，如果書本唔係放喺當眼位置，小朋友好難見到、拎到，佢又點會記得睇書都係其中一樣得閒可以做嘅嘢呢？ 同樣道理，書本擺放整齊，書脊向外，等小朋友方便揀書，都係希望吸引到小朋友去拎黎睇，配合埋舒適嘅環境，充足嘅光線，小朋友就會睇得開心又舒服啦！ 2. 預計等候時間，帶書出街 冇耐性、扭計嘅小朋友，我真係見唔少，喺餐廳等食飯啦、搭地鐵搭巴士啦、甚至坐住BB車，好似冇嘢做、安靜一陣都唔得咁，時下嘅媽咪嗲哋最常用嘅方法，當然係俾部I-PAD或者智能電話俾佢啦，快捷方便，自己搞得掂又唔會嘈到人，自自然然，小朋友就培養咗一得閒就可以玩I-PAD嘅習慣喇。 但係如果，佢一得閒或者一扭計，媽咪俾佢嘅係一本故事書，而唔係I-PAD，咁會點呢？媽咪會好忙囉，又要陪又要講，想抖吓都唔得，但係到佢識讀嘅時候，故事書就取代咗I-PAD，我諗lee個係每個父母都想見到嘅習慣黎嘅，所以我哋出街總會帶一兩本寶貝女近期鐘意睇嘅故事書，搭地鐡有位坐又睇得，喺餐廳等食飯又睇得，媽咪行街睇緊衫佢坐埋一邊又睇得（哈哈！）。 3. 專注時請勿打擾 都係嗰句啦，而家我哋太趕喇，咩都要完成得快，未完成一樣又要做下一樣嘢，但係，當小朋友專心睇緊書嗰陣，試吓唔好打擾佢，俾佢繼續專心，就算就快要食飯、刷牙、做功課等等，都唔爭在嗰一陣啦，等佢完睇埋嗰幾頁就讀晒一本書或者一個chapter，對於幫小朋友培養閱讀習慣都好重要架！ 4. 讚賞和認同 可能我哋係中國人啦，好少表達自己嘅感受，但係唔表達，小朋友又點知你諗咩呢？寶貝女做啱嘢，我都希望話俾佢知，等佢得到個肯定，同時又鼓勵佢繼續做。讀書都一樣，既然我覺得lee件係一件正確嘅事，又希望佢繼續做，當然要話俾佢聽啦：「好乖喎，自己睇書，個故事係咪好得意呢？睇多啲唔同嘅書，仲可以睇到唔同嘅故事添呀！」 持之以恆，我相信個個小朋友都可以愛上閱讀，愛上書本。 原來一開始，媽咪就好鐘意影低lee個情景架喇！
