媽咪晚晚努力讀故事，終於算見到有少少成效，就算寶貝女讀緊一間有學劵嘅幼稚園（等如課程勁淺），平時只係一個星期上一小時嘅英文興趣班，K2嘅寶貝女認到嘅英文字（不過未識寫），原來真係可以多過一個小學一年級學生。 話說有一次我同寶貝女搭地鐵，見到一個爸爸帶住一個六、七歲嘅囡囡坐咗喺我哋隔離，個女仔一坐低，就好開心咁拎咗本啱啱買嘅英文生字書出嚟睇，寶貝女超八卦，好想同姐姐一齊睇，姐姐又想教呢妹妹喎。 姐姐就開始問：「妹妹你知唔知lee個係咩字呀？咁lee個呢？中文點解呀？」 寶貝女都識答喎，連佢爸爸都話：「嘩！妹妹好叻喎，佢本身唔係講英文架喎！」 （當然，lee個時候媽咪梗係偷笑緊啦，哈哈！） 姐姐越問越覺得奇怪，就問佢爸爸：「點解妹妹識咁多英文字嘅？我記得我細個嗰陣都唔識lee啲架喎！」 而lee個爸爸，就俾咗一個好值得我學習嘅答案：「都唔出奇呀！學習就好似跑步咁，梗係有人跑得快，有人跑得慢架啦，只要你有盡力跑，跑到去終點就ok，遲少少又有咩所謂呢？」 喺怪獸家長盛行嘅年代，聽到lee位爸爸不慌不忙嘅回應，大方得體，正正係各位怪獸家長需要知道嘅道理。每個小朋友嘅發展都唔一樣，只要父母細心留意，安排佢哋有興趣或者有天份嘅嘢專注學習就好，其他嘢，只要小朋友盡咗力，打好基礎，又駛乜急呢？有人游水快，有人跑步快，都係好正常嘅事啫！ 媽咪唔多鐘意買lee類型同學習有關嘅玩具，lee套係親戚買嘅，佢鐘意就會自己拎黎玩，唔駛逼架！
