香港人就係咁，明明唔急，但係仍然行得快，明明唔趕時間，見到地鐵、巴士都係要追，其實行到邊度都好，小朋友都有學習機會，係時候慢落嚟，俾小朋友感受、體驗、觀察，得到嘅、學到嘅，會唔會多過俾佢哋番暑期班？ 「媽咪媽咪，你睇吓？點解呢度寫住NO CLIMBING嘅？」（哈哈，好彩，至少你都識睇！） 趁住唔趕時間，媽咪梗係把握機會同佢講吓道理啦！「係喎，點解嘅？不如我哋黎睇吓？呢度高唔高呀？爬咗過去會點呢？」又認字，又睇圖，又學安全意識，幾好呀！ 「媽咪媽咪，我可唔可以去"GUM"吓嗰個機？」 「如果冇人需要用就可以去睇吓啦！」 喺呢部售票機學到嘅嘢真係多到不得了！我會叫寶貝女㩒吓我哋經常去嘅地方，例如：我哋而家喺邊度呀？我哋跟住去邊呀？公公婆婆住邊呀？媽咪喺邊度番工？科學館喺邊度？搭飛機要去邊個站呢？又中文又英文，每次講少少都可以講好多次。售票機又可以學價錢喎，好似$13.50即係咩？原來係「十三蚊五毫」，口語就應該講「十三個半」，又可以講吓成人票／特惠票，又可以講吓邊個站轉車，只要講出黎有趣易明，小朋友一定學到嘢！ 「媽咪今日駛唔駛增值呀？」咁啱要增值嘅話，梗係趁機俾佢試吓啦！ 由紙幣、插八達通卡、入錢、睇餘額、到gum制拎番張卡，一步一步講解，再由佢自己做，好開心架！趁住寶貝女4、5歲呢啲年紀咩都問，媽咪真係要好好把握機會，教佢多啲嘢呀！ 不過慣咗趕，有時都真係會唔記得，希望我都時常提醒自己，慢落黎，耐心回應吓寶貝女嘅問題，一齊學習，發掘身邊有趣嘅事物。
