在職媽咪除咗怕小朋友痴工人姐姐之外，另一個苦惱可能係小朋友扭計唔想媽咪番工，一話出門口就喊到拆天，攪到媽咪番工冇晒心機，成日囉囉攣。其實lee啲情況成日發生喺我身上，無計啦，叫做證明咗我同寶貝女關係好囉，係好事嚟嘅，但係都會喺FB呻吓！ 有朋友建議，「趁佢瞓出門口」，咁做好嗎？ 好多媽咪都認為，小朋友見到自己離開嗰一刻就會喊，所以不如唔好俾佢見住自己出門口啦。問題就嚟喇： 佢咁想媽咪陪，可能佢起身見唔到媽咪會喊架喎，媽咪番緊工唔知就算？ 媽咪平時８點出門口番工，如果小朋友習慣７點半起身，媽咪係唔係要７點半前番工？ 媽咪番工都係為咗個屋企咋喎，點解搞到好似做錯事咁，唔俾得小朋友知？ 呃得一時唔呃得一世，長遠都用lee個方法嗎？ 我鐘意同寶貝女講道理，亦都希望將個事實同媽咪嘅感受話俾佢知，希望佢識得體諒，但係做媽咪嘅，都要俾小朋友知道媽咪明白佢嘅感受喎，加埋一啲正面思維，攬住佢用容易明白嘅說話講晒出黎。 「今日唔駛番學，我知道你梗係好想媽咪陪你玩喇，係咪呢！不過你都知媽咪要番工，番工搵錢先可以買你鐘意食嘅水果架嘛，我應承咗公司９點鐘要番到去做嘢，如 果我仲唔出門口，我就會遲到架喇，你都唔想我做一個唔守信用嘅人架嘛，係咪？你諗吓，媽咪今晚一收工又番嚟陪你玩喎，不如諗下今晚想同媽咪玩啲咩遊戲啦！」 如果係星期四、五扭計，我會話：「你睇吓，今日已經星期四喇，仲有兩日就星期六，媽咪好快就可以陪你玩成日喇！」 如果寶貝女都未收聲，有時間嘅話，我會重複講多次，但係夠鐘都要走架，咪一邊出門口一邊聽住佢喊囉，有時都真係幾難捱架。 不過千祈唔好期望講完道理就以後都唔扭喎，小朋友係好善忘架，就好似你提醒佢哋要講「唔該」咁，都要不斷提啦，但係重複做多幾次之後，漸漸就會發現，佢扭嘅次數少咗、喊嘅時間都短咗架喇！ 有一次我趕住出門口，同佢講咗聲byebye就走咗，點知一落樓就收到寶貝女嘅電話，喊住同媽咪講：「媽咪你唔記得同我攬攬呀，鳴．．．」媽咪心裡面勁內疚，但係同時又sweet到暈咗！除咗勁冧之外，lee次經驗話俾我知，寶貝女要我聽到佢喊，佢就會打電話俾我，我係走唔甩架！ :-P
