讀故事呢，真係一件好奇怪嘅事，小朋友讀讀吓就會識字，好神奇！ 4歲3個半月嘅寶貝女，琴晚一見到我放工番屋企就同我講：「媽咪！hurry to help lee本書好好睇呀，brother bear同sister bear搬咗papa上個wheelbarrow，跟住推佢番屋企，因為papa嘅arms同legs好痛呀……」 今次係寶貝女第一次，真係第一次，自己讀咗一本我未讀過嘅故事書，再講番一啲內容俾我聽，雖然唔係故事嘅全部，已經足夠令媽咪好感動喇！ 寶貝女由細細個開始睇啲冇字嘅圖畫書，慢慢越睇越多字（以英文為主，易學啲呀嘛）。媽咪一邊講，一邊指住啲字，等佢知道我讀到邊，同時加強佢嘅注意 力；當然，由於廣東話先係我哋嘅母語，每句我都會用廣東話講多次；遇到一啲生字，媽咪會用中文解釋，加埋動作或者上網搵圖片，生動又有趣；讀完個故事之 後，我會問佢有關故事內容嘅問題，加強印象；成個讀故事嘅過程，我都冇刻意叫佢記住或者重複問佢嗰個字點解，有一日就會突然發現：「點解你識lee個字 嘅？」……「哦，喺嗰本書度有架嘛！」 對於學習嚟講，讀故事比起玩字卡好一百倍！ 讀故事有上文下理，學習嘅詞彙有連貫性，容易明白，我諗唔算係死記；由於學語文，並唔係學單字咁簡單，文法、句子結構等等同樣重要，故事書就可以慢慢滲透lee方面嘅概念；只要揀啱小朋友鐘意嘅書，就可以引起佢嘅閱讀興趣，從而培養閱讀習慣。 講真，真係好神奇，以寶貝女而家嘅程度，估計已經去到我自己小學一、二年級；佢學得咁開心，睇嚟媽咪讀故事嘅工作，都要維持多好幾年喇！
