有一次帶埋寶貝女同幾個friend一齊喺茶餐廳食下午茶，咁啱播緊跑馬，寶貝女問：咩嚟架？我好正經好認真地答佢：馬仔玩緊跑步比賽！我兩個friend即時爆笑，咁都講得出？ 係架！幾簡單易明？！練番黎架嘛，如果唔係，點同個幾歲人仔講長篇大論嘅道理呀！ 我覺得媽咪嘅演繹好重要，用詞要啱佢嘅年紀，又要講得有趣啲，目標要令佢明白，又會記住。我自信地認為，我演繹得最好嘅，就係食藥嘅道理。 我同寶貝女講，我地身體入面有好多士兵（抵抗力），我哋食多啲有營養嘅食物，士兵就強壯啲大力啲，有病菌走入我哋嘅身體嘅時候，打仗都易啲架！ 食藥水嘅時候…… 可能啲病菌太惡喇，醫生而家就要俾多啲士兵（藥水）走入我哋嘅身體入面幫手。媽咪仲會對住支藥水講：士兵，你係咪會幫我哋架？你要努力打贏啲病菌呀！ 病咗唔肯瞓覺嘅時候…… 士兵叫你快啲瞓覺喇，你嘅身體快啲休息，佢哋就可以幫你專心打病菌架喇！ 病咗唔食嘢嗰陣…… 哎呀！ 你唔食嘢，士兵咪冇力囉？士兵冇力點打病菌呀？ 有咗lee個基礎，其他Ｎ個例子就可以自己延伸。 我相信，好聲好氣同小朋友講，只要佢明，佢一定會聽架！講一次唔聽再講，講兩次唔聽繼續講。可能就係咁，寶貝女自細扭計唔肯食藥嘅情況，都好容易解決，唔係唔扭，但係好快就肯聽你講。 上個月寶貝女發燒，佢問：「媽咪，我點解會咁熱嘅？」 我話：「梗係啦，士兵打緊仗要用好多力氣架，佢哋一定好熱，仲打到出晒汗添呀！」
