當啲長輩睇住我同小朋友講道理嗰陣，佢哋總係會講得我「太仁慈，唔夠強硬」。 我想講，我嘅強硬，係態度同原則，並唔係語氣。 寶貝女好唔鐘意洗頭，成日同我講，媽咪我唔想洗頭呀！媽咪可唔可以唔洗頭呀？媽咪不如聽日先洗頭啦！媽咪…… 媽：點解唔想洗頭呀？ 女：個頭都冇污糟，唔駛洗啦！ 媽：你琴日又冇洗，今日出街又出汗，咁都話唔污糟？你都唔想今晚瞓覺嗰陣，啲污糟嘢痴晒落你個兔仔枕頭度架嘛！ ……寶貝女好認真咁諗咗一陣…… 女：我都係唔想洗喇，洗頭好麻煩…… 媽：短頭髮洗頭冇咁煩喎，不如剪短啲？ 女：但係我鐘意長頭髮喎！ 媽：我梗係知啦，你想同媽咪一樣長頭髮，不過你選擇咗長頭髮，就要花多啲時間打理同清潔，頭髮唔清潔會生頭蚤，好痕好唔舒服架；相反，你乖乖保持頭髮乾淨，健康嘅長頭髮就可以紮唔同嘅辮，我估你一定會好鐘意啦！ 貪靚嘅寶貝女最後當然敵唔過道理連篇嘅媽咪，乖乖哋去洗頭啦！ 我嘅語氣強唔強硬？點止唔強硬，簡直溫和到冇朋友，但係我態度堅定，佢再唔肯我就會繼續講，講到Ｋ.Ｏ.佢為止，過程中唔單止要諗不同嘅道理同佢講，仲要㩒住自己嘅脾氣，雖然大聲講一句「快啲去喇，仲唔去？」效率會高好多，但係我哋做父母嘅點樣做，小朋友就一定有樣學樣，所以我而家做嘅嘢，自私啲黎講，都係為咗寶貝女第時對我溫柔啲啫！ 學校嘅親子活動，由媽媽向公司請半晝假出席，Ｄ大假就係咁好快冇晒！
