呢一篇呢,唔使我啲旅伴們開聲我都set咗呢個題目做chill住遊金邊啦。梗係啦,喺我哋喺村落嘅義工遊完成之後,有啲就飛去暹粒睇吳哥窟、有啲繼續東南亞之行、有啲提早回港,淨低嘅就留喺金邊幾日。 可能坊間介紹柬埔寨主力真係講暹粒同吳哥窟多好多啦,金邊好似少啲嘢睇,啲嘢食冇乜特別,但其實不然。今次喺冇乜特別計劃之下遊金邊,估唔到都有驚喜! 乜金邊都有花園餐廳? 街邊小食,可惜今次未有機會食 同香港舊樓唔同嘅設計 Chill住遊金邊之漫遊中央市場 我哋入番金邊時係早上九點左右。由於我住嘅酒店同中央市場好近,所以先喺酒店放低行李,因為入住時間未到嘛。(但係酒店櫃台話可以中午時段提早check-in!)之後就一齊行去中央市場睇睇啦。 好多包辣木子種子呀 歐式建築 同俄羅斯市場相比,中央市場似乎少啲嘢行,但整體嚟講分類都分得清楚,唔難行。 有啲旅伴仲買咗柬埔寨款嘅褲呀、sarong呀咁,準備去吳哥窟時著嚟影相!風味當然極佳啦,不過後來收到反映:啲布可能薄啦,裂咗!(笑)買唔買番嚟著,就留番俾網友自行判斷啦。 中央市場 (Central Market) 地址:Kampuchea Krom, Str. 128, Phnom Penh 55555, Cambodia 終於check-in咗酒店啦(最衰冇影低間房:張牀都幾大張!好舒服!)不過既然都係午飯時間,問咗櫃台有乜好介紹後,就喺角落頭度間越南餐廳食嘢。(個老闆娘原來係廣東人!香港人唔使愁雞同鴨講咯!)不過實在太肚餓,冇相機食先。 金邊大街嘅舊式住宅 唔算Chill住遊金邊之清明去萬人塚,使唔使咁震撼呀? 喺我哋出發去村落之前,已經去過吐斯廉屠殺博物館了解赤柬歷史,已經夠牙煙。而家就係Part 2去萬人塚! 萬人塚,本名係瓊邑克 (Choeung Ek),本身係一個華人墳場。好地地去安葬先人,赤柬就攞咗呢度將啲柬埔寨人直接殺冇赦!而呢度有個塔就安放咗好多逝者嘅頭骨! 冇錯,係頭骨呀。 為表示尊重,裡面冇影相。雖然預咗牙煙,有哂心理準備,但係我哋去嗰日啱啱係清明節,效果太震撼了! 正門 入唔入去睇,留番俾大家決定(我入咗去睇過,堅係震撼) 附近仲播緊柬埔寨喜慶音樂(新年嚟緊),好似有啲格格不入呢 萬人塚 (Choeung Ek Genocidal Center) 地址:Roluos Village, Sangkat Cheung Aek, Phnom Penh, Cambodia 入場費:6 USD(包語音導遊) 番到酒店休息後話咁快就夜晚啦。雖然話冇plan過點樣行金邊,但係一到食嘢呢就已經揀定先! Chill住遊金邊之食好嘢:法式小酒館 Bistrot Langka 呢間餐廳就位於51街裡邊啲巷仔,tuk-tuk係入唔到去,喺附近停低,所以都係要開手機導航搵吓。51街一帶餐廳林立,都係啲新潮地方,值得行下同搵嘢食。佢係主打bistro,比起餐廳冇咁正式,選擇當然亦較少,但係一啲都唔差㗎! tuk-tuk停喺星巴克出面,一陣再介紹 青檸梳打、芒果冰(好似係) 芝士蘑菇gnocchi 吞拿魚他他(極上推介!) 喺柬埔寨食好嘢仲平過香港!兩人平分都只係17.50 USD!香港可能先叫到一碟主餐咋! Bistrot Langka 地址:1 132 Z13 Street 51, Bkk (Perpendicular to Street 51, at the end of Patio Hotel path) Phnom Penh 12000, Cambodia 電話:+855-70-727-233 只收現金 難得附近有間星巴克去chill,梗係入去睇吓啦! 點擊圖片放大 酒吧街都尚算乾淨 獨立紀念碑 Chill住遊金邊之塔仔山 嚟到第二日嘅chill住遊金邊啦。今次計埋我就得三個人去捐窿捐罅,而第一站就搭Grab去塔仔山 (Wat Phnom)。相傳一位叫做Phnom嘅女士喺附近嘅河邊見到一顆樹,而樹中間有四尊佛像,然後建廟作為記念。而呢個亦係金邊Phnom Penh名嘅由來。(柬文Penh者,山也。) 點擊圖片放大 +8 塔仔山 (Wat Phnom) 地址:Street 96, Norodom Blvd, Phnom Penh, Cambodia 入場費:1 USD 或者 4,000 KHR (柬埔寨籍人士當然免費) 塔仔山附近嘅法式建築,應該係政府大樓之類 舊市場嘅螄蚶 行行吓行攰咗就走去搵按摩店,之後仲去電訊商幫旅伴增值。(之前喺機場選用Smart台) 講開攞本地SIM,話就話喺機場即買即用,但係如果大家忍手等到入到市區再去任何一間電訊商分店,買到嘅數據同通話量仲抵過機場!(呢個係旅伴特別叮囑我去提及喔!哈哈!) Chill住遊金邊之食好嘢:社企餐廳 Friends the Restaurant 話說我啲旅伴去過呢間餐廳食過,反應唔錯,之後介紹我哋去食。呢間其實係社企餐廳嚟嘅。話說一間叫做Mith Samlanh嘅機構以前搵咗啲露宿者(仲要係無家可歸嘅小朋友)同邊緣青年去幫手,俾佢哋有自力更生嘅機會。對社會責任有強烈同感嘅網友,絕對值得去拜訪同開餐! 軟版tacos 夏日限定之香蕉花豬肉沙律 Friends the Restaurant 地址:#215 St 13, Phnom Penh, Cambodia 電話:+855-86-968-651 或 +855-12-802-072 可收信用咭或現金 突發情況:信用咭唔work! 輪到我發生狀況!話說我用加拿大信用咭找Grab數一直相安無事,但無啦啦個app話過唔到數!我㩒極都冇反應,想load香港信用咭又冇香港SIM信號(冇開漫遊;今次當係教訓!),然後想用加拿大信用咭碌咭俾錢都唔得!好在我香港信用咭冇事,過到數。旅程心情稍為影響,邊會無啦啦cut咭咁唔好彩呀? 後來第二朝我Skype番去加拿大嘅銀行投訴時,個接線生話我知當時喺加拿大所有Visa同MC冧咗檔,將可用信用額變做零!之後我喺通話期間同步去Grab找番數:冇事! 雖然由晏晝到第二朝加拿大信用咭用唔到,但係都還可以繼續chill住行。諾羅敦·施漢諾親王像附近嘅街道都好多嘢行,飲食嘅,買衫嘅都有。仲有啲人帶寵物出去行街添! 柬越友誼紀念碑 柬越雙語 獨立紀念碑附近嘅大街 紀念品點嘅特別手信 諾羅敦·施漢諾親王像 獨立紀念碑 Round 2 之後就去AEON買手信番香港啦。喺商場裡面有一檔係賣炸香蕉片,有原味、貢布黑椒味同香辣味揀。好香口㗎。(可惜冇影低。)買齊嘢後就去番51街附近chill住行咖啡店! 個星巴克乜羅省San Fran咁聲嘅?(按:柬埔寨有大量美國出口嘅二手車,難免有種親切感。北美嘅網友當然秒懂。) 本地連鎖咖啡店Brown Coffee嘅期間限定飲品:Berry White 坐耐啲都抵 Chill住遊金邊之食好嘢:法國餐廳 Khema Pasteur 喺我出發去柬埔寨前已經同旅伴們有共識,有一餐會食高級法國嘢!叫咗四樣嘢(三餸一湯)加甜品,落樓只需60 USD!冇錯,60蚊美金咋,即係471港幣!三人平分都係20 USD (157 HKD),喺香港去同級餐廳叫到一碟前菜已經贏咗!所以我哋賺港紙去柬埔寨使真係好值㗎。(茶) 點擊圖片放大 Pasteur Khema 地址:228 #163 Pasteur Street Corner Street, Ground floor Arunreas Hotel Building, Phnom Penh 12000, Cambodia 電話:+855-15-823-888 可收信用咭或現金 嚟到最後一日喺金邊啦。打完電話搞掂咗加拿大信用咭之後,就落樓下買本地豆腐花食。 ' 都幾香口㗎。一盒盛惠2.50 USD。 講開喺金邊用柬幣:有時啲舖頭會用1 USD兌4,100 KHR,比公價貴咗100 KHR,有2%咁多。一般建議係除非有大量柬幣趕住洗,否則用番美金就著數啲。但係用美金俾錢,找番柬幣就維持公價。我就冇乜點太介懷啲婆乸數,但都係講聲好啲,費事誤會咗找少咗錢咁就唔好啦。(謎之聲:不過如果柬埔寨政府鼓勵國民用柬幣嘅話,會唔會defeat咗個purpose呢?) Chill住遊金邊之國家博物館、遊河邊 由三人行再進化到四人行,我哋就去咗國家博物館...外圍去睇。入場費偏貴,所以冇入去。(而其中一個旅伴仲要係啱啱由暹粒番到金邊,吳哥窟都睇咗好多啦。) 點擊圖片放大 國家博物館 (National Museum of Cambodia) 地址:Street 13, Sangkat Chey Chumneas, Khan Daun Penh, Phnom Penh, Cambodia 入場費:10 USD Sisowath Quay就係金邊嘅河邊大街。雖然天氣都係熱但係未至於頂唔住,都行得舒服嘅。 河邊嘅佛廟。其實喺博物館後面係皇宮嚟,但係由於有衣著限制同埋時間關係,冇入去睇。 點擊圖片放大 +3 Tonle Sap河比較多泥水,但亦都係交通樞紐重要通道 Chill住遊金邊之食好嘢:健康飲食 Backyard Cafe 金邊嘅最後一餐就去主打純素嘅Backyard Cafe。話就話純素啫,但係有一兩味餸係有雞肉呀、三文魚呀咁。當然佢嘅主體係圍繞住有機食材同環保啦。其實環保呢個課題喺柬埔寨都做得唔錯㗎。 大滿足 Backyard Cafe 地址:House 11b, Street 246, Phnom Penh, Cambodia 電話:+855-78-751-715 可收信用咭或現金 金邊旅程就咁告一段落,番香港啦。 後加音樂歌單(綜合旅伴們嘅建議): Camila Cabello - Havana ft. Young Thug 再加酒店推介: New York Hotel H Hotel 後記: 番到香港,一下子由義工做體力勞動再回復番正常恤衫西褲番工,呢個感覺又幾特別。 喺上一個post講咗我參加義遊嘅心得,在此不贅了。但係會唔會好想再去多次柬埔寨?當然想啦,不過今年已經計劃咗其他旅程,基本上用盡請假攻略賦予我動用annual leaves嘅日子。希望出年再嚟柬埔寨,話唔定去埋暹粒呢! 臉書專頁:在此