打緊呢篇文時我人喺北京，好明顯用緊Wi-Fi蛋上網啦。 如果大家仲記得我嘅北歐遊講到我嘅旅伴啲信用卡喺瑞典用唔到嘅囧況嘅話，就知今次嘅題目係關乎信用卡密碼嘅問題啦。 喺香港，信用卡一律都係Chip-and-signature，即插卡後簽名啦。喺加拿大、歐洲就用Chip-and-PIN，即插卡後打密碼。 咁好啦，當你去歐洲（甚至中國）買嘢碌信用卡好「不幸地」要你打密碼，通常銀行教你係打六個零或者直接㩒enter算。結果反而係過唔到數！ 正確嘅做法應該係： 輸入你自己預設嘅六個數字密碼 輸入你自己預設嘅六個數字密碼 輸入你自己預設嘅六個數字密碼 由於太重要，要講三次！ 以下情況由我本人親自測試，確認成功先講。 話說有日我去港島東區藥房買藥，個店員碌我張信用卡（可能部POS個讀chip功能壞咗），結果就問要打密碼啦！香港卡都要，咁奇怪？機會嚟啦！打咗自己嘅預設密碼後：通過！ 好喇，我喺北京出差時都要去食飯㗎嘛，咁個侍應就拍我張銀聯信用卡（有銀聯閃付功能，與PayWave、PayPass同類），理論上唔使再打密碼啦，點知要喎！好在我晨早改咗我預設嘅密碼一打：又通過！ 證明：唔係打六個零㗎，唔該！ 可能有網友誤會打咗密碼會等同cash advance，其實係兩碼子嘅事！Cash advance只可以用於櫃員機㩒錢（當然我唔鼓勵咁做啦，食息食死你）；而信用卡係插入商舖嘅POS，所以係正常交易。 好啦，點set密碼呢？記唔記得喺你收到信用卡嘅時候會俾埋你一張密碼紙嘅？希望冇掉咗喺垃圾桶（涉及個人私隱，好危險㗎）。開咗佢再去櫃員機打咗個六個數字密碼，然後改一個你自己記得嘅咁就得啦。離港前務必開通海外交易功能（如適用）。 好快啲set密碼啦！ 後記：北京捐窿捐罅，兼喪用微信支付 日檀區某個俄羅斯人mall咁上下嘅地方，好多好嘢食 應該係老北京嘅味道吧？ 由於我去親北京都係同當地同事交流，所以都仲未有機會自己搭地鐵出去捐窿捐罅。不過有樣嘢對我嚟講係有啲驚喜嘅係：居然用到微信支付嘅人民幣銀包！ 可能早幾年我開微信帳戶時，唔知發乜鬼神經攞我個香港身分證做認證定係乜，個港幣同人民幣銀包開通咗我都唔知，直至到有朋友過咗一仙人仔做測試，居然用到！ 當然啦，香港人用人民幣銀包冇中國嘅銀行戶口都唔使諗㗎啦，再加上香港銀行卡唔可以喺中國用人民幣銀包，整微信支付把鬼咩？支付寶都咪搞啦！ 好在仲有一個方法一定得：請有中國嘅銀行戶口嘅朋友幫手。 一手交人仔現金，一手就電子過數入你微信支付銀包，然後喺中國境內直接使用！ 用呢個方法頂住先啦。 究竟香港喺流動支付會唔會普及就唔知，但多一個方法俾錢冇壞嘅。 臉書專頁：在此
