終於嚟到旅程最後一站:奧斯陸。喺玩完狗拉雪橇後,要盡快番到Airbnb執行李,因為班機係朝早六點鐘!基本上我係冇瞓過,最後喺飛機瞓度隻豬! 一到奧斯陸後,我啲體力開始返嚟啦!如果大家仲記得我嘅預備篇呢,我喺奧斯陸特登租富豪!本來係俾XC70俾我,但最後租車公司話部車有少少問題,就俾咗我部XC60! (利申:本人已經喺加拿大試揸過XC60,再加上本身揸S60,所以成個感覺番哂嚟。) 挪威奧斯陸車牌 DR 17642,富豪XC60 D4 AWD五缸柴油四驅車:多多指教! 重點嚟啦:連歐洲版富豪都顯示到中文! 既然租咗車呢,我哋嘅玩法就同北美生活一樣:住市郊!我哋住喺一個叫做Bærum嘅地方(類比多倫多嘅密西沙加、Brampton嗰啲),附近係Sandvika。去到Sandvika嘅大型購物中心就搵嘢食啦。結果搵到一間叫做Bølgen & Moi嘅餐廳食嘢! 由於餐單全部寫挪威文,我哋就膽粗粗問侍應有冇英文版,點知係冇嘅!得啦,呢間店做本地人生意,信得過! 點擊圖片放大 Bølgen & Moi Sandvika分店 地址:Sandviksveien 176, 1332 Sandvika 網站:bolgenogmoi.no/english/restaurants/sandvika 關於喺挪威碌信用卡: 香港卡:冇瑞典咁麻煩,可以插卡後簽名,但要攞埋護照去證明身份! 加拿大卡:直接打密碼就得啦。 之後就入奧斯陸市中心自由行! 12/29 第一站:奧斯陸歌劇院當然走唔甩啦! 奧斯陸歌劇院 Den Norske Opera & Ballett 地址:Kirsten Flagstads Plass 1, 0150 Oslo 網站:operaen.no/en 雖然我唔多好歌劇(粵劇另計!哈哈!),但係去得奧斯陸歌劇院就梗係欣賞佢嘅新派北歐簡潔風啦! 點擊圖片放大 +6 12/29 第二站:閒逛Karl Johans Gate 本來仲想去附近嘅Akershus堡壘入去睇吓,但係行咗幾個圈都搵唔到入口參觀,冇陰功!最後都決定喺Karl Johans Gate行吓。聖誕燈飾都未拆㗎。 點擊圖片放大 +3 其實,個感覺有啲似上海。 點擊圖片放大 +3 去到第二日啦:太陽仲未升哂,但都把握時間影低住所附近嘅風景。 我哋住喺Bærum嘅Airbnb喺山上,有少少似三藩市、溫哥華嘅感覺。 一時諗起羅文喺1979年參保力嘅jingle... 光輝的清晨 一切都積極 青春的感受 應愛惜~ \ 12/30 第一站:健康‧教育 The Vigeland Park 地址:Nobels gate 32, 0268 Oslo 網站:vigeland.museum.no/en/vigeland-park 點解會特登講健康教育呢?呢個公園有好多尊銅像,表現出人喺唔同年紀時嘅動力同美態...當然而裸體嘅形式啦。真係老少咸宜㗎! 點擊圖片放大 +16 12/30 第二站:博物館任去,去到去咗邊個都唔記得! 其實呢,我哋去到奧斯陸嘅時候買咗Oslo Pass,可以俾我哋博物院任去。用得唔好嘥啦,係咪?啲博物館喺Akershus堡壘一帶,所以泊車喺嗰到附近就得㗎!不過記住入夠錶喎,否則好似我咁就少少趕頭趕命就唔多好啦。哈哈! 笑談廣東話陪伴大家(按:又故意用美國咪去睇距離喇) 白色車係易污糟啲嘅 為咗睇薑餅屋,你會去到幾盡? 北歐嘅薑餅係薄過北美㗎;去旅行時不妨帶一盒番嚟吖 點擊圖片放大 +2 孤寒財主史高治;童年回憶也! Up!!! Spongebob Squarepants 聰明笨伯 點擊圖片放大 +6 12/30 第三站:挪威版天水‧圍城 Fredrikstad 去到奧斯陸居然去到市郊去explore,本網算係獨家啦! 我啲旅伴問我可否去一啲比較冇乜人去嘅地方,咁我就喺Google Map亂搵就搵到一個叫做Fredrikstad嘅小鎮;再睇過啲相又覺得好有風味,所以就決定睇一睇啦。由奧斯陸開車要個半鐘,類比多倫多揸車去瀑布。 梗係啦:如果去旅行來來去去都係熱門地方,又好似唔夠過癮,所以都值得一試。 果然,一入到去Fredrikstad就亂咁explore啦。(仲狠狠地測試我部Xperia Z5 Dual喺天黑影相嘅功力!) 點擊圖片放大 +2 係有人住㗎,唔係死城 北美嘅小鎮風情就見得多啦,北歐都唔輸蝕㗎 點擊圖片放大 +2 同北美小鎮明顯唔同嘅地方就係其建築風格 點擊圖片放大 +2 真係天水‧圍城㗎 點擊圖片放大 還好,仲有餐廳開門做生意。挪威人都其實幾好食pizza嘅,所以水準都唔差。我哋就去咗個連鎖pizza店食晚飯。特登留低個地址俾大家去GPS啦,不過盡量泊近啲啫。 Peppes Pizza Fredrikstad分店 地址:Torvgaten 57, 1632 Gamle Fredrikstad 網站:peppes.no 點擊圖片放大 +4 後來我同Airbnb屋主傾開話我哋去咗Fredrikstad行吓,佢哋都幾驚奇點解呢班香港人會識搵到咁遠,連當地人都係放假時揸車遠行先會去吓。其實咁揸法仲好:因為真係local到唔local嘛! 去到旅程尾聲,仲要係除夕!旅伴們要先行番香港,所以就一早車佢哋出機場。本來係想揸去瑞典Gothenburg睇車(富豪車廠所在地!),但係個博物館喺除夕嗰日係冇開!咁無謂嘥柴油剷入去,我番去Bærum執嘢同hea吓啦。 唔知挪威人係點過除夕呢? 12/31 除夕睇煙花,點知... 根據Airbnb屋主介紹,喺奧斯陸市政廳附近有倒數活動。咁我梗係唔執輸開車去霸位啦。 奧斯陸市政廳 Rådhuset 地址:Rådhusplassen 1, 0037 Oslo 網站:oslo.kommune.no 唔知點解,好鍾意奧斯陸市政廳嘅設計!佢有一種美東會有嘅舊式屋宇嘅感覺。成棟嘢係啡色㗎。 點擊圖片放大 +3 去到海傍準備睇煙花啦。雖然寒風刺骨但都冇影響倒數嘅興緻! 點擊圖片放大 +3 點知喺就嚟倒數放煙花時:居然大霧!乜咁唔老嚟吖? 2017年咁就開始咗啦。恭喜發財... 其實我反而覺得挪威人過新年比較含蓄啲,冇北美啲人咁喪。完哂倒數後都比較安靜地離開現場,揸車歸家,開始新嘅一年。 再次同大家睇睇市政廳附近吖 點擊圖片放大 +3 上咗公路番去Bærum。而我嘅聖誕新年北歐遊亦都圓滿結束,番去多倫多啦。 一路易發發,利利是是吓! 後記:今年係明顯少咗寫網誌係因為工作上有新嘅變動:終於喺香港工作同生活啦!喺過去幾年北美趴趴走都留下唔少回憶。來年都會諗吓我個網誌要轉型寫本地嘢會唔會更好。希望大家繼續支持本網喔! 臉書專頁:在此