嘩，部車嘅音響轉咗語言嘅？又幾似英文噃... （其實我特登轉去挪威語試嘢啫） 冇錯啦，各位網友，本網站帶咗大家去美西（大加州）至美東（波士頓、紐約、華府）咁耐，決定衝出北美，去北歐過聖誕啦！ 其實呢，小弟自移民加拿大咁耐，就過咗聖誕新年咁耐，冇離開過。我同期嘅中同大同都起碼有一次落去紐約或者直接番香港過聖誕新年！ 今年終於可以去富豪、紳寶、宜家、H&M嘅發源地過聖誕，去挪威睇北極光...去感受一個不一樣嘅聖誕新年，絕對值得！ 同埋，瑞典挪威通街碌卡！香港同加拿大要去到無現金生活仲有好長嘅路走，就算美國碌卡密過加拿大都仲未夠瑞典挪威全面！ 相信大多數網友去歐洲係搭巴士火車地鐵。一個人孭書包去當然好啦，但今次繼埋我四人同行，除咗斯德哥爾摩全部火車地鐵外，挪威會係直接租車！好老實講，我唔想我啲旅伴中途冷親，咁就唔好啦。 當然，自己嘅揸車癮都想滿足嘅。 喺北極光勝地Tromsø（挪威語讀troom-suh)，H記租車冇自動波車我租！爽呀！最好真係整部V40我楂，因為加拿大冇！ (D) Volvo V40 or Similar 28 km/liters 喺奧斯陸，因為旅遊pass包市內泊車，唔租埋落去對唔住自己，結果H記唔知係咪知我係現役富豪車主，就俾部XC70我！嗚呀！ Reserve this Exact Model (W6) Volvo XC70 4x4 Aut. 17 km/liters 住方面就會採用airbnb去訂整個單位。我負責斯德哥爾摩部份，但喺我就要特登提早出發去拜會屋主啦。無他嘅，瑞典人對聖誕節都好重視，平安夜嗰日就好忙gathering或者教會活動（如適用），嗰日先攞鎖匙就論盡啲。 小弟會喺12/22由多倫多出發，12/23下午到斯德哥爾摩。到時仲要搞掂SIM卡、公車卡 (SL Access)、同旅遊套票，到時同大家分享。 Facebook Page: 按此 （自己㩒入去再㩒like去追蹤一下啦）
