各位網友,小弟啱啱先喺香港番嚟,亦去咗檳城玩,所以冇時間更新!咁既然上回講過要做一個乘後感報告,咁就寫咗呢個先啦。 喺多倫多來回香港搭加航呢,非AC15同AC16莫屬。AC15係早機,而AC16係晏晝機。咁比起上次我搭國泰嗰陣,變咗我要超早起身出YYZ,又或者中午前到HKG排隊搞check-in。咁時間運用就見仁見智啫,但我覺得國泰稍勝。 5/24: AC015 YYZ - HKG 能夠喺一年內兩次回港,點都係興奮嘅 一入去波音777-300ER機艙,就知國泰將會面臨大挑戰啦:部機嘅機上娛樂大大改善! 以前加航啲機唔知點解我只可以插個私家headphone到半路,唔可以完全插入,否則啲聲冇一半咁滯!今次係叫做矯正咗之前嘅問題! 連移動地圖(咦?)都大大改善 Big Bang Theory XDDDD 邊個配廣東話字幕嘅,簡直係天才!同我一人一信讚/LIKE砌safety video嘅隊伍! Cockpit view都幾特別 不過老老實實,始終加航嘅客源都係北美人士居多,所以比起國泰就可能選擇有限。好在,有雷鬼音樂聽吓。 今晚食乜餸 呢個有少少伏,陣間就明㗎啦 我第一餐食雞,菜算多,都係健康之選 懷念在波哥大的日子。幾時再去呢? 同熱愛這片土地 大家刻骨銘記 愁或喜生與死 也是香港地 再次在101公路上奔走吧(熱血) 我的少女時代有得睇啦!身為男生嘅我都覺得好有共鳴... (伏爾泰細佬出沒注意)又話係牛飯嘅,粥嚟嘅!?雖然我又唔偏食都唔好咁對我嘛 (伏爾泰細佬又出沒注意)個移動地圖hang咗機! 就咁樣,又瞓吓又醒吓嘅情況吓,終於番到香港。其實今次班機係延遲咗係因為個冷氣有事,整都整咗個半鐘先飛。 6/7: AC016 HKG - YYZ 咁回程呢?分別唔大,但係今次係香港廚房出嘅薯仔牛肉就正喇!雖然冇國泰喺多倫多出發嗰份多汁,但係都係碟碟清。 但係今次啲戲冇套好睇,除咗有優獸大都會,但係冇廣東話配音!大佬呀,起碼都有子華祖兒把聲嘛,過癮好多㗎! 結論: 今次算係叮噹馬頭,因為加航嘅配套真係進步咗好多,對國泰都算係直接威脅(如果論搶客嘅話)。但係我覺得機上娛樂嘅選擇不及國泰咁全面,起碼國泰係會加好多亞洲區嘅電影同音樂入去。 所以,如果唔係旺季番香港嘅話,我都係傾向搭番國泰,加航留番美加航程,同我之前嘅網誌所講嘅一樣。 下回再寫吓三藩市嘅新發現同埋香港、檳城之旅啦!繼續嚟我嘅臉書專頁睇吓相;呃個like都好吖。(笑)