啱啱先喺華府公幹番嚟，雖然要發現嘅地方來來去去都係國家廣場一帶，但係揸車去M街一帶嘅Georgetown呢，別有一番風味㗎。 點擊圖片放大 出發華府之前已經聽聞Georgetown Cupcake杯子蛋糕店㗎啦，但係日日排長龍，排得嚟其他地方唔使去？啲杯子蛋糕會唔會overrated？值唔值得排？ 呢個任務交俾我去處理啦。 排隊時間：週一7:30pm左右 好在我喺Google查過，通常中午至下午茶時間人流最多，可想而知會排幾耐！而我喺下午七點半排都係等咗半個鐘啫。 八點鐘：終於入到去！但係去到收銀處仲有啲人排隊叫蛋糕，所以再上去蛋糕店嘅網站睇定叫乜，費事唔嗲唔吊腦袋空白就唔好啦。 因為真係decisions, decisions, decisions... 太多味揀啦！ 如果我去排咁耐隊去買一個普通味嘅杯子蛋糕，咁就冇意思啦。所以我早有準備：喺蛋糕店網站查一查期間限定嘅味，一論到我嘅時候一次過叫哂。結果... 淨係賣相已經贏咗！大部份「期間限定」嘅味都叫到。 但係十二件唔通我自己食哂咩？食完晚飯後，就叫同事自己揀三種。以下嗰三味就係我揀咗嚟食...（英文介紹直接抄自蛋糕網站） Orange Blossom: Madagascar vanilla cupcake infused with orange zest and juice topped with an orange-zest infused vanilla buttercream frosting and a fondant orange blossom (source: Georgetown Cupcake) 唔算特別甜，但係有一陣淡淡嘅橙味，個忌廉都算balance得好好 Lavender Earl Grey Cupcake: A Madagascar vanilla cupcake infused with lavender sugar and Earl Grey tea, topped with an Earl Grey tea–infused buttercream frosting, a sprinkling of lavender sugar, and a pink fondant flower (source: Georgetown Cupcake) 賣相最靚係佢。花味就唔係好明顯（可能我少食薰衣草味嘅嘢），個蛋糕本身有用茶葉，所以整體食落唔會滯。試得過㗎！ Cherry Cheesecake: Cherry cheesecake cupcake with a graham cracker crust and topped with a cherry infused frosting and cherry blossom fondant (source: Georgetown Cupcake) （冇錯係我唔好，揸車番酒店又急彎又盛，個頂塌咗呀！） 呢一味嘢果然帶來驚喜！基本上係將芝士蛋糕變做杯子蛋糕。餅底用graham crackers，脆口同有牛油香；忌廉芝士唔會太重，最緊要係車喱子冇撞味之餘，更加冇藥水味！正呀喂！ 後來我再問其他同事啲味如何。我都估到㗎啦：好鬼甜。冇計，北美啲甜食有時真係落重糖，但比起其他杯子蛋糕（至少目前為止）呢檔水準非常高。排半個鐘頭都抵啦。 簡單攻略：晚飯早啲食（最好喺Georgetown一帶），然後七點半左右開始排隊，同時上網睇定叫邊隻味。你可以叫一件、半打、或者一打。兩人同行就半打夠啦。如果係叫Assortment就唔該喺下午五點前上網訂咗先，然後現場pick-up！ 好啦，Georgetown Cupcake喺邊度㗎？ Georgetown Cupcake 3301 M Street NW (corner of 33rd & M) Washington, DC 20007 +1-202-333-8448 後記：啱啱用臉書專頁同網站睇睇個統計，估唔到好多人睇到上篇國泰乘後感篇文。多謝支持！（照樣呃like去收最新消息啦。） 不過又有預告啦：我五月尾六月頭番香港探親，但係國泰機票好乜貴！所以會搭番加航啦。為此，我亦會做一個乘後感報告，用同一個condition做（設定：經濟艙同埋正常餐），以示公正。最後網友睇完後，往返香港多倫多就自行決定囉。（笑）
