金元萬兩 不等如大獎 拿著藏寶圖入場 你中了空寶 都跟你的方向... （喂！） 有曰：德州乜嘢都大啲。無他嘅，佢係美國第二大州，僅次於阿拉斯加州。 同德州有關嘅流行曲，除咗Twins嘅德州的故事外，仲有周杰倫嘅牛仔很忙。都係鄉村搖滾類。雖然，德州的確風行呢類音樂。 如果有網友曾經去過德州讀書、旅行、或者公幹時，都有食過當地嘅特色燒烤！德州嘅燒烤係以木燒（唔係炭燒）為主，通常燒牛腩、排骨、胸肉、腸。有時仲可以燒魚添！ 今次就同大家去德州嘅首府柯士甸（或稱奧斯汀）去搵好嘢食！ 今次介紹嘅係名叫Lamberts Downtown Barbecue餐廳。點解要特別介紹呢？ 其實，我去過柯士甸兩次啦。第一次係喺2013年。嗰時去已經聽聞好食，諗住晚餐走去食啦，結果因為要等位等兩個鐘所以作罷。（真係座無虛席！） 今次呢，一去到酒店時再搵地方食飯。由於太想食燒烤，但又想去市中心一帶，咁谷歌就開咗幾間俾我。咁我睇過Lamberts個網站之後就車同事去食。 結果：泊車泊番同一個停車場！當時即刻認得上次冇去嘅就係我今次揀嘅。一入去攞枱果然有室外位！（室內位要等三十分鐘！）太有緣份啦！ 我打趣同侍應講我哋足足等咗兩年。 點擊圖片放大 比利時啤酒。煙煙地味都幾特別。 美式牛牛部位切法 先嚟一份野豬排骨送酒先啦！ 自家製芥末、燒汁、辣醬 呢碟叫做charcuteries嘅嘢係煙肉類拼盤，另加鵝肝！唔係講笑！ 嚟啦嚟啦。先嚟燒肉眼扒先！Medium rare，肥瘦適中。 燒安格斯牛排骨。都易拆骨喔。 加芝士加酸忌廉嘅薯蓉 小椰菜。冇菜點得㗎？ 甜品menu。哈哈個設計幾特別，係講有隻甜品批點整。不過我冇點呢個，反而叫咗... S'more Bread Pudding! 美加盛行將綿花糖夾兩塊餅乾食。呢個係變奏版。好好味，甜而不膩。 其實唔使叫咁多碟㗎。今次四個人分果然啱啱好食哂，冇食淨。等兩年先有機會食總算賺到了。不過最好嚟之前book枱先啦。 Lamberts Downtown Barbecue 401 West 2nd Street Austin, TX 78701 +1-512-494-1500 另加：行吓柯士甸市中心 是次一行，租咗Zipcar嘅豐田混能車Prius。始終環保行先。 柯士甸市中心一帶酒吧臨立，有啲都有live band㗎！難怪柯士甸有Live Music Capital of the World嘅美譽。 點擊圖片放大 呢間歷史古蹟酒店Driskill Hotel聽聞猛鬼。信不信由你，不過入房敲門再講聲「打攪了！」等等嘅習俗都少不了。（咁又唔使拜四角嘅。） 其實德州都有好多城市都值得去㗎。下次唔知等幾時咯。 後記：估唔到上一次講拉麵有咁多個click！網友們真係好食拉麵喎，定係我上傳篇文係星期五中午時分，個個嘅肚打鼓咁款呢？繼續嚟我嘅臉書專頁吹吓水吖。（你要㩒咗Like先可以收到實時更新㗎。哈哈！呃Like喎。）下個禮拜去瀑布區！敬請留意！
