各位網友唔好意思，冇出post好耐啦。呢排公私繁忙，冇乜時間出去搵吓美加嘅正嘢。 我諗大家都去過唔同拉麵店果腹啦。香港人熟識一蘭同埋豚王。咁多倫多呢？先有金豚(Kinton)拉麵，後來有山頭火(Santouka)、雷神(Raijin)、三草亭(Sansotei)加入「戰團」，多倫多拉麵熱潮就咁開始！ 金豚拉麵，顧名思義就當然係主打豚肉拉麵啦。湯汁類別、濃度、麵條粗幼、配料...點整都得！豚肉方面，可以揀腩肉或者豬踭，有標準或加大份量揀。 其實早喺2012年金豚拉麵喺多倫多大學南邊開咗檔！適時拉麵熱潮興起，排隊都排一個鐘！不過嗰時可能叫得太多嘢，又冇做gym打底...滯咗。 隔咗三年，喺北約克區開咗第四間。近咗喎，梗係去一轉啦。 店外 店內...當然有酒飲啦。不過我要揸車，唔飲得。 我叫咗加大份嘅豬腩肉嘅辣湯底幼麵，加芝士同牛油！（嘩！食肥你呀！）（按：食完後翌日，已經安排做gym。） 絕對肥死嘅「元凶」！哈哈哈哈！ 原理上，豚肉通常配粗麵，雞麵（有㗎！）配幼麵。不過我就「玩轉傳統」用幼麵。無他嘅，我要減碳水化合物入口。 有幾好味？「仲有最靚嘅豬腩肉」係梗㗎啦，湯頭夠辣，有濃濃蒜泥添。由於麵夠幼嘅關係，就算我成碟芝士同牛油倒哂入去，我成碗麵食哂！ 當然，一下子掟哂芝士入湯頭，由shredded還原為一舊煙韌嘅芝士，再夾住「仲有最靚嘅豬腩肉」一齊食（雖然應該唔係正宗食法）：爽呀！ 不過有少少問題產生：頭先講到有濃濃蒜泥味嘅？食完後至少12小時可能會有「溝通上少少不便」。出緊pool或者第日要開會嘅網友要注意喔！ 之後我第日做gym完全冇問題！啲熱量夠燒！ 好啦，金豚拉麵喺邊度㗎？ Kinton Ramen 5165 Yonge Street North York, ON M2N 5P5 +1-647-350-7887 （其他三間嘅位置請去網站查詢） 後記：八月頭有朋自遠方來，不亦樂乎。應該會多咗機會去explore多倫多，甚至瀑布區！敬請留意！At the meantime，嚟我嘅臉書專頁吹吓水吖。間唔中都分享吓旅遊相關資訊都唔錯喔！
