終於有時間更新個網誌啦！呢排都係忙公司嘢多，同埋出trip時完全冇時間係搵啲特別地方介紹下。 為補番數，今次介紹平時都冇機會食嘅嘢：柬埔寨嘢！ 喺美加，想食東南亞嘢食最多係越南嘢。因為歷史因由嘛，好多越南人喺戰時都走到美加落腳，後來落地生根。其次係泰國嘢食多，星馬印比較少（雖然我喺大學時識都幾多印尼人！）。柬埔寨就真係好少，至少喺東岸係咁。 話說我同大學班兄弟出嚟吹水，搵我去揀地方。咁我就九唔搭八地搵到柬埔寨嘢食，喺多倫多midtown嘅！ 呢間舖頭食柬埔寨嘢同泰國嘢。既然泰國嘢喺多倫多食較為常見，今次就食完全未試過嘅柬埔寨嘢啦！仲要係估估吓咁叫！ 我就好鍾意食牛，就叫咗呢碟叫做Golden Beef嘅飯食啦！（謎之聲：關高登乜事？XDDDD） 碟嘢有已用香料醃過嘅牛肉、花生（正呀喂！）、香茅、椰奶、四季豆、辣椒、同洋蔥！隔住個mon都聞到，食多幾碗飯都抵！哈哈！ 雖然超好食，但係我對柬埔寨嘢唔熟識，究竟呢碟嘢高綿話會係點叫呢？ 我另外嗰兩位兄弟叫咗同一碟嘢，叫做Kako Khmer。聽個名就係高棉有關啦，但有乜呢？有雞、青木瓜、大樹菠蘿（很猛喔！）、椰奶、同四季豆。 我都有試少少，但同我叫嘅高登牛肉（喂！）比較，就淡啲啲啦。 ...可能我真係鍾意重口味嘅！哈哈！（絕無雙關語嘅意思！否則嚇死大家囉！） Khmer Thai喺邊㗎？ Khmer Thai 1018 St. Clair Avenue West Toronto, ON M6E 1A4 +1-416-654-0609 注意：呢間舖頭主要做晚市，開五至九。但係喺星期二至五都做午市：十二至三啦！去嗰到食可以搭叮叮㗎！（當然揸車最方便。）
