執筆之時，人已經回到多倫多啦。其實下個禮拜再去華盛頓開會，但係冇理由蛇一次主日崇拜掛？況且聽日仲要教書同音樂事奉，想蛇？咪使旨意。 今次主要都係講喺三藩市趴趴走。我租部Sentra/Sylphy居然有個名，叫做Intro！哈哈。過癮。 第二日就去咗聖荷西見工作夥伴兼食飯。咁我住嘅酒店就喺一個叫做Hayward嘅城市裡面，出入三藩市或者聖荷西非常方便，實在係策略位置。 見完合作伙伴後就再番去酒店換短袖衫。加州十一月都仲廿幾度，暖到呢真係唔想番多倫多！ 之後就戲肉啦：殺入三藩市上金門橋！相信各位網友對呢條橋都有一定認識，在此不贅了。 由Hayward去三藩市可以有兩種方法： 經92號州際公路向西行，過咗San Mateo-Hayward橋後轉101號國道向北行入三藩市 經580號或者880號州際公路向北行，經Bay Bridge入三藩市 而我就選擇後者。多彎，好好揸㗎！ 喺加州，揸滑浪車（以福士Transporter為正宗）咁先係勢藝嘛。 上Bay Bridge了！ 一見到一棵棵棕櫚樹就精神爽利囉！ 點擊圖片放大 不如直接跳去上金門橋嘅一刻啦。 嚟咗三次三藩市，見到條橋，相都影埋，但係未揸過上去。咁又係嘅，北上就去Sausalito呀、San Rafael呀等等，唔算係旅遊區。巴士團未必咁上去。 對我嚟講，係繼番香港踩單車去大尾篤後，另一個心願達成咗啦。 哈哈。巧見同類。（利申：由移民到而家屋企揸富豪。） 就嚟上到啦。 OH YEAH~ 馬路天使提提你：北上去San Rafael方向免錢，但係南下去三藩市要收費喔。 咁上咗條橋就諗住係咁意入油再入番去三藩市啦。經過一個鎮仔叫做Sausalito，幾靚㗎。（後來先知原來黎明嗰首及時擁抱嘅英文版歌名居然係Sausalito！） 點擊圖片放大 泊咗架福士R32 好啦，回程啦。個GPS點咗我去... 上山下海！？ 好鬼斜呀！ 癲咗。喺山上都搵唔到落山位置，結果要向當地居民求救。 嗰度啲山路可以同香港（特別係港島區，例如薄扶林咁樣）有得比！我用20mph上山，一上去就即跌到15mph，連隨無段變速機用「低波」chur行佢！全程要用L波進行。部車二千cc算係咁啦。 如果係棍波車，我諗而家為止嘅技術應該燒極力子燒手煞同撞花尾泵把啦。（啋～） 香港有車牌嘅網友，歡迎笑我呢個大鄉里吧！ 點擊圖片放大 嗯。心願達成。下次再揸過。 同事介紹，信號山好值得去。今次上斜就冇咁斜啦。 點擊圖片放大 有靚橙 有靚橙 食過包你話讚 吔個橙 吔個橙 唔吔橙你就潺 買個橙 買個橙 連核食其實歎 沒靚橙 沒靚橙 冇橙橙盞慘慘 （記得I Love You Boyz攞咗Twins嗰首零四好玩去惡搞嗎？ XDDDD） 點擊圖片放大 夕陽無限好 x 月亮說 冬天太陽好快落山，五點就落啦。但係計番去東岸時間，當係八點落山，好似夏天咁，都算係一個安慰吧。（苦笑） 去食晚飯啦。先前揸三藩市市中心經過一處好歐陸feel嘅地方，喺Union嗰頭，但係諗極諗唔到條街名。今次知道啦：係Columbus Avenue！ Columbus Avenue食肆臨立，以意大利菜為主。 點擊圖片放大 +2 古董國產陸地帆船（朋友，小心違例泊車呀。） 就咁樣，三藩市開心自駕遊告一段落先。番去酒店都要做埋公司嘢先去瞓。 PREVIEW: 三藩市用腳趴趴走、（特別追加）發生輕微車禍後點樣處理！ 敬請留意下回嘅post！哈哈！
