其實第四日我得半日去玩，因為我搭下晝機番去多倫多，經滿地可轉機。 仲記唔記得上一個post關於Boston Commons呢個大公園呢？今次就算係hea行一轉，休息吓都好。 點擊圖片放大 +2 啲小朋友等個噴水池開 青蛙沉思像 XDDDD 點擊圖片放大 +3 咁先至係夏天嘛！ 臨離開Boston Commons時，遇到示威，好似係同美國非法移民居留有關的。 賓夕凡尼亞州嘅門諾派Amish基督徒唱聖詩。佢哋呢派同我哋熟識嘅例如浸信會呀、信義會呀、衛理循道會呀等等唔同。我對佢哋嘅認識較淺，網友們如果有相關資料，可以同我分享喔。 終於都要離開波士頓啦。本來就三點幾鐘機飛去滿地可，點知delay！還好當時訂機票時預好鬆嘅時間（由滿地可去多倫多喺機場等三個鐘），如果唔係就好大鑊。唔通無啦啦走去租車公司租車揸去多倫多咩？ 喺滿地可轉機番多倫多時，叫咗個煙三文魚多士飽肚先。 就咁樣，波士頓四日三夜趴趴走就告一段落啦。 嗯，下次去邊度好呢？華盛頓DC？歐洲？星馬泰？遲啲先諗啦。開工先嚕！ 再講番旅館先：我住嗰間Hostelling International Boston位於唐人街一帶。六個人（可全男、全女、或男女共用）一個cabin，三個碌架床。當然有獨立房間可供選擇啦，但係當時訂房時... 冇哂。 廁所當然係共用啦，一個坐廁一個企缸一個洗手盤。乾淨到你唔信！梗係啦，除咗有人清理外，住客都好自律嘅。 旅館有廚房俾住客去擺低自己買嘅食材去煮！如果你真係要慳budget，買叮叮飯，都冇乜問題嘅。早餐就旅館包！不過得麵包麥皮烚蛋乳酪之類。唔啱胃口都可以出去唐人街食中餐或越餐。當然為求真正經歷北美人士嘅生活，試吓食清啲啦。 仲有乜嘢設施呢？Wi-Fi有啦、game room有啦...呀係，洗衫房！住過hall嘅識搞㗎啦，在此不贅了。 其實波士頓啲酒店真係超貴，分分鐘二三百蚊美金一晚，住旅館不失為一個好嘅選擇。 Hostelling International Boston 19 Stuart Street Boston, MA 02116 最近地鐵站：Chinatown (Orange Line)
