雖然呢，我個網誌係不定期更新嘅，不過如果整到吊癮嘅感覺，都冇所謂嘅。起碼有啲期待嘛。 第三日嘅行程就專注於波士頓市中心一帶。波士頓真係唔使點揸車㗎。一來公共交通非常方便，二來啲街道規劃唔似多倫多呀、紐約咁「四四正正」（其實似歐洲多），唔熟路都易行錯呢。 旅館每日都有唔同活動。我喺波士頓第三日就係去Freedom Trail啦。Freedom Trail呢，係有著住十七十八世紀衣服嘅導遊去行遍波士頓歷史建築，同埋講解美國立國嘅歷史。 冇錯，波士頓之所以咁出名就係美國立國歷史嘅一連串事件嘅發生地！ 我喺多倫多讀中三（我哋叫做九年班）要學加拿大歷史，而美國立國史都有提及。的確，美國獨立後，有啲親英派嘅就走到去加拿大。 點去行Freedom Trail呢？其實有幾個地點買飛嘅。今次就喺一個名叫Boston Commons嘅公園去買飛同開始呢個trail啦。 點擊圖片放大 +8 呢個就係Old State House啦。美國獨立宣言就喺呢度宣讀。每年美國國慶都會有人喺個樓台咁做㗎。 Freedom Trail終點站剛好係Faneuil Hall同Quincy Market！咁都夠鐘食晏啦，就梗係搵最地道嘅嘢食啦！ 波士頓當然唔止龍蝦正，周打蜆湯係非常出名。如果預鬆budget嘅話，嚟多個龍蝦三文治更佳！ 真係好飽肚㗎！同埋啲蜆都啖啖肉。唔錯。 之後就去逛吓Beacon Hill。你可以聯想類似中環上環西環咁嘅地方。但係啲樓宇keep得非常好。留意吓啲煤氣街燈同埋磚頭路面喔！ 點擊圖片放大 +7 之後又搭電車去波士頓嘅名店街Newbury Street。如果有網友鍾意購物，用半日去行成條街都應該可以喔！ 頂癮！ XDDDD 點擊圖片放大 +4 登峰造極之立體影印 好多古董衣車喔！ 夜晚，想食蠔。聞說Union Oyster House喺當地非常出名。梗係啦，佢係全美國其中一個最老嘅餐廳喎！不過就算我用OpenTable App去訂位，去到都要等。可知有幾旺！ 點擊圖片放大 +4 主角上場！食生蠔當然可以點少少cocktail sauce或者horseradish，不過我認為唧啲檸檬汁落去，然後享用... 鮮味無窮！ 當然後來都點咗炸蠔做主菜啦。可以覺得：嘩，咁日本feel嘅？不過對我嚟講，食蠔可以有一餐幾味，冇所謂啦。 夜嚕。番旅館休息同執行李，因為之後就飛番去多倫多啦。我會喺下一個網誌再講多少少間旅館俾大家。
