開始Part 2前... 德國贏咗世界盃喎。 講起世界盃除咗我睇德國隊同荷蘭隊之外，美國隊都有留意㗎。梗係啦，有奇連士文做教練，嗰時睇初賽同十六強都知今年美國隊更加有實力。 ...連守龍門嘅Tim Howard都俾美國人推薦為未來國防部長（維基網仲直接被KUSO添），奧巴馬總統都話會考慮吓喎。 哈，咁算唔算係公民提名呢？ 好，回正題先。 上回講到去Plymouth, MA啦。咁參觀完Mayflower II同Plimoth Plantation之後呢，就揸車北上去Salem啦。點解咁九唔搭八走去Salem睇一睇呢？因為當時啲巫術都幾「盞鬼」吓！佢有個女巫博物館㗎，不過我就唔好彩啦：塞車！ 去唔到，咁臨時搵參觀得嘅地方去睇吓啦。結果又九唔搭八地我個手機GPS就帶我去The House of the Seven Gables啦。呢間有七個屋頂角（係咪咁叫㗎？）嘅屋呀，有三百六十年歷史㗎啦！又係一個景點了解當時啲人嚟美國定居嘅情況。 點擊圖片放大 +4 （潮州話：呷茶呷茶！） Salem亦係一個做貿易嘅港口。又朱古力又咖啡又薑乜乜物物... 點解冇屋內嘅相嘅？因為裡面全部有歷史文物嘅關係，導遊講明熄相機。咁就無謂攞個手機相機搏啦，做乜破壞規矩呢？ 夜晚就入番去波士頓，去North End食飯。 去North End就論盡少少。雖然公共交通去到呀，但係唔係喺正North End度落車。如果係揸車嘅，注意North End街邊泊車只限於居民泊車！結果都要泊去政府Parking Lot。 呀係，我揸嗰部係第二代起亞Soul。都幾靚仔㗎！ 我諗點解香港冇得買呢代Soul啦：千六cc。論牌費：死症。（美加版當然有二千cc啦。） 波士頓嘅North End可以話係小意大利。如果你好意大利嘢食，咁呢到實啱你。連啲建築物都好歐洲feel！ 點擊圖片放大 +3 食完飯準備攞車時：嘩，乜咁熱鬧嘅？ 原來係阿爾及利亞入咗十六強呀！ 太陽落山都一大半，夜晚都幾靚。 番到旅館，睇到有咁嘅壁報版： 五個都去咗三個，仲要係唔係chur住去嘅情況下達成，都算唔錯啦。 第三日：波士頓市中心趴趴走！敬請留意！
