今次係第一次用呢個平台去分享旅行資訊，希望讀者都睇得開心啦。 喺多倫多半工讀、畢業、出嚟社會工作都一段時間，平時旅行都係加拿大本土，美國就較少。就算係美國都係開工嘅多。唔使搵食咩？ 諗吓諗吓，發現到原來信用卡嘅積分可以換張機票去玩，諗住利用初夏休息一番，所以就決定去波士頓啦！ 相信我哋香港人去美國玩，最令人熟識嘅係紐約呀、羅省呀、SFO咁，如果係喺美加長大嘅就計埋佛羅里達州（因為去cruise嘛）。唔計出差公幹，其他城市都好少去。波士頓係其中一個。希望睇完呢個網誌後，你哋都會心郁郁走去睇吓！ 今次嘅遊縱呢，我以兩條（其實應該係四條）YouTube片作為藍本： 48 Hours in Boston 我們EYE旅行（波士頓；有三集喔） 準備好未呢？Let's go! 咁早去到多倫多機場都要醫吓肚先啦。呢檔嘢過癮之處喺用iPad叫嘢食。我叫咗個burrito作早餐。非常好味又飽肚。當然價錢就偏貴啦。 我搭嗰班機係差唔多十一點鐘飛。由多倫多去波士頓（直航）其實一個鐘多啲啲就到啦。當然我哋都興road trip嘅，不過咁揸法都要八九個鐘左右。可以飛嘅，當然飛去啦。 到咗波士頓後就當然去旅館drop低哂啲行李先得啦。喺波士頓機場你可以搵到MBTA (Massachusetts Bay Transportation Authority)嘅售票機買飛。我建議去買七日遊 (Charlie Card 7-Day Link Pass)。當時我去嘅時候係$18 USD。（7/1後價咗價啦，要$19 USD喔！） 我住嘅旅館係叫做Hostelling International Boston，喺波士頓唐人街一帶。咁由機場搭機場巴士SL1去South Station，再行過去旅館！ 好在而家啲手機都有導航系統，跟住佢去都唔會錯！（請注意你嘅roaming價格！有必要就買美國SIM上網。不過加拿大Rogers網絡去美國roaming上網每日每50MB就 $7.99 CAD，就住用都唔會死人嘅。） ...路途中點都要影啲相嘅。（相機為Sony Xperia Z1，保證滿意。） Check哂in同擺低哂行李後，就正式趴趴走嚕！ 第一站係搭地鐵去劍橋市。去嗰度點會冇原因呀... 用潮語「識...嘅，一定要...」做句子先：識去劍橋市嘅，一定要去哈佛大學！醒目！ 劍橋市嘅感覺係咪好似去咗英國咁呢？ 當然入到去校舍內就感覺唔同啦。可能係歷史攸久嘅關係，好多人會話多咗啲「書卷味」，我反而唔係特別覺。我本身喺多大出嚟，出入圖書館同課室無數次，可能咁樣個感覺唔強烈... 但係無可否認嘅係，論QS世界大學排名，哈佛全球排第二，僅次於MIT！好，繼續... 點擊圖片放大 +4 參觀完校舍同埋Museum of Natural History後，實在太熱了，喺food truck檔口見到現做嘅雪糕，當然買一杯抖吓暑先啦。唔同時段有唔同味去選擇，今次有芒果味。係taste到芒果肉囉，唔可以同你平時喺超市買嘅芒果味雪糕相題並論！ 行完差唔多成個下晝，搭番地鐵入番波士頓市中心啦。但係距離食晚報仲有少少時間，埋去Quincy Market同Faneuil Hall一帶hea陣先。 我個人就鍾意去啲比較旺嘅地方（特別係食肆）行一轉先。有乜好嘢食都知喺邊度搵嘛。 喺波士頓，Quincy Market集合眾多美食於一處。而Faneuil Hall不單只係一個市集，亦係一個開大會嘅地方喔！1742年已經起好啦。Quincy Market反而遲啲，喺1826建成。 點擊圖片放大 +6 晚飯呢，就走去The Liberty Hotel食啦。點解會特登走去嗰度呢？因為呢間走店嘅前身...係間監獄嚟㗎！ 由監獄改建為酒店其實都係幾近排嘅事！（1990年監獄關閉；後來由麻省General Hospital擁有後，於2007年變成酒店！） 裡面嘅格局你會覺得好唔同。 點擊圖片放大 +5 The Liberty Hotel裡面有五間餐廳。今次就去咗Alibi。嘢食嘅變化都幾多，咀刁嘅同想試新嘢嘅會鍾意。好飲酒嘅都可以叫一杯嘆吓，實為賞心樂事。 都夜啦，番去旅館休息吓，準備第二日嘅行程吧。
