有日行尖沙咀唔知食咩好,見到呢間 Plan B Café 有同 Mee 合作就入去試下。叫咗2個 main 同1個 side,逐個嚟講下先。 首先係個炸芝士條。成碟嘢就有6條加沙律,份量嚟講算多。佢寫就係 Mozzarella嚟嘅,食落芝士係拉絲,都拉得幾長。但係味道方面就冇咩芝士味(可能正常係咁我唔識食啦),少少咸味咁。外皮偏硬同厚身,唔脆,冇咩油炸嘅感覺。有啲沙律仲要浸濕左啲芝士條。嗱,個人意見食落個質素覺得似氣炸食品嗰種,我就唔會encore啦! 再嚟係個意粉,一嚟到蕃茄味好香,有啲香草嘅味道,食落冇想像中咁太酸,佢menu標明係辣嘅,不過嚟到就唔係好覺辣,反而成個意粉都好開胃。但係意粉本人略有點軟身得濟,冇咗咬口。帶子彈牙,不過食落好似冇煎過咁,見到佢個面都係白色冇嗰種香口嘅味道。整體嚟講算唔錯,可以一試。 跟住落嚟個魚,一見到個樣已經覺得Pat汁似茶餐廳啲白汁,仲結左1撻撻,賣相麻麻哋。嗰2條蘆筍煎得OK,但係食落啲纖維真係粗得濟,處理得唔夠好,不過呢個唔算係主角就原諒佢啦。個魚嘅肉質係實的的嗰種,冇咩魚油香味。調味食落有啲單調,唔肯定有冇落其他調味,但我條廢脷話我知呢舊魚真係咸得濟。食落似係沾左粉煎,有啲太油膩。個人唔會 encore。 嘢飲就正常發揮,士多啤梨奶係士多啤梨醬加奶嘅結合,個榛子朱古力,榛子味淡咗啲不過朱古力味夠返,都唔錯。整體嚟講,餐飯成500蚊埋單係有啲揼心口嘅,但我見網上面好多人都話OK,唔知係咪已經改良咗所以好食咗?有冇人試過可以話我知..