之前行過覺得幾吸引,終於叫咗外賣返屋企食。見到佢有個 Panger 班堡好似好得意咁,試咗個豬柳蛋班堡。佢係用2塊厚pancake去代替個包,我原本以為佢個 pancake 會有唔同嘅調味,點知都仲係普通 pancake 味,蛋唔知係咪因為外賣送得耐唔係流心嘅,豬柳食落都好似無咩特別,不過冇金拱門咁咸同油(應該係用咗高級嘢我估)。因為冇醬得塊芝士,整體食落少少偏乾,但都尚可接受,個班堡有啲似高高高級版金拱門早餐 set 夾埋,嘗鮮可以試下,不過我自己就唔會 encore 了。 輪到個薯條喇,係粗薯嚟嘅,份量都畀得好多,直頭爆袋咁濟好開心。外賣擺咗咁耐都仲 keep 到 7 分脆嚟講,可想而知即炸起時食係有幾咁脆口。薯條冇嗰浸油益味,食落仲保留到薯仔嘅嗰種澱粉質味(明嘅人會明hahahahha),好好食!不過我個人覺得咸咗啲,如果少啲鹽就仲 perfect! 嚟到今次嘅主角 – 隊長漢堡真心正,個包上下都烘過,雖然少咗浸牛油香味覺得差咁啲,但係跟住落嚟每層都好正,嚟嚟嚟,逐層逐層講。首先,塊生菜新鮮到世界級,簡直係喺廣告生菜咁款,完全冇苦澀味,又唔晦,就咁生啪都好食。之後到個蕃茄,係冇生菜咁出色但都唔錯,甜甜哋完全唔酸。個醬落得好足,酸 maymay 但又唔會搶晒其他味,食落似係佢哋自己調嘅 source。再落就係芝士,冇咩特別,就係一塊溶溶哋嘅芝士。煙肉就純粹多咗樣嘢開心啲,但個包冇咗佢都唔會失色。接住落嚟塊牛堡,牛味好足好香,煎得啱啱好,中間有少少粉粉哋色完全係 perfect,佢冇作過多調味,我覺得直頭可以比美和牛漢堡(可能誇咗啲但我真心覺得好正)。總括嚟講,班堡係有 gimmick 嘅,價錢都公道但係就麻麻哋冇咩驚喜。反而 side dish 嘅薯條就好好食,同埋個漢堡令到我好想試埋其他款,睇得出佢哋用料又靚又新鮮,值得一試!