前幾日去咗九龍灣德福行下, 晏晝唔知食咩好, 見到呢間 Tamago-en 靚靚哋, check 過唔見有色打算試下。首先個黑松露雜菇意粉嚟到賣相其實好普通（唔記得咗影相😂），上面有隻溫泉蛋。撈埋之後食發覺比想像中好食好好多。菇味幾濃，同埋冇咩菇嘅草腥味同苦澀味。個溫泉蛋撈咗落去之後令到成件事好creamy同soft咗，黑松露方面我自己估佢係用黑松露醬，唔算好濃但隻蛋同菇嘅味搭夠。 相比之下個蛋包飯就好普通，個汁酸酸哋有少少肉味，抵讚嘅係牛肉好惗一啲都唔柴。但整體嚟講只可以話佢不過不失，我就唔會encore喇。 嚟到 Tamago-en 梗係要食下佢哋啲 Tamago 啦。今次就試埋佢個原味玉子燒，味道同平時喺出面食嘅差唔多，但就冇咁甜。口感比起平時食開嗰啲冇咁實的的，比蒸滑蛋硬啲。有個汁附送，有蘿蔔溶同鰹魚味，同個蛋好夾，可以一邊點汁一邊唔點食晒2個味。 最後一道係我見佢幾得意叫嘅，本身以為有驚喜，點知嚟到佢就係一個卷起咗嘅大阪燒味面餅。一個面餅包住紅薑 +芝士+少少蔥，上面鋪隻蛋大概7分熟，期待嘅流心係...冇嘅。因為太多粉食到中間會濟濟地，唔會 encore。
