如果諗緊買唔買PEACH的平機票，尤其你係第一次去日本請好好閱讀我呢次滿足的飛行經歷，再決定買唔買PEACH平機票。 本人於2013年購入2014年1月凌晨X:XX 出發大阪的來回機票，價值比19000YEN多少少。 本人以半結伴形式去玩京阪神(頭幾日同朋友一齊，之後自己再玩多2日)，未出遊記，但我忍唔住出左呢篇飛行經歷先。 總括黎講成個旅程都好開心，無諗到由乘搭PEACH的一刻開始已經咁開心。 <<行李check in 篇>> 由於一心帶空喼去買野，所以去程輕輕鬆鬆上機。至於回程方面，我買左20kg luggage，再加上10kg hand carry，就算我買左十幾件衫(當中有3件大褸)、幾對鞋、一大袋藥妝、兩大袋零食、仲有一堆雜物、手信等，都可以輕鬆check in。由於唔洗玩搬行李遊戲，所以一啲都辛苦，仲可以慢慢飲淡水再施施然入閘。 <<上機>> 上到飛機，我越來越興奮，興奮到好似透唔到氣，我唯有盡力隱藏我澎湃的心情，好彩我無大叫到！我越諗越唔明，點解我比左19000YEN多少少，就可以搭到去日本。(留意當時是2014年，UO仲未開始狂推平機票) 我坐得廉航預左無ENTERTAINMENT，加上係紅眼機，所以我打算訓一教。當隔離左右都自備頸枕，點解PEACH你唔早講叫我自備一個!!!? 算啦，唔理，好彩無頸枕我都一樣訓得唔錯。 雖然成程機一句日文或者日式英文都聽唔明，但我竟然覺得好興奮！見住日本空姐、聽住機上的廣播，我真係覺得自己距離日本又近左。 <<落機>> 由於廉航，無天橋接駁，要自己行落地。落到地個一刻，我開心到暈！當時係凌晨5點幾，行出機艙FEEL到超大風，正正因為咁凍的天氣，我覺得自己真係到左日本！ <<後話>> (認真MODE) 事隔近兩年，我依然覺得呢一次經歷好難忘。可能因為第一次去日本，本身心情都好興奮。而坐PEACH就可以令人由未到日本就已經FEEL到日本的味道。如果當時係坐HK EXPRESS，可能就要到入左境先FEEL到。不過真係要注意搭PEACH未必溝通到，但有需要時空姐都會盡力幫你。 如果同HK EXPRESS比，我覺得HK EXPRESS比較準時、座位比較舒服，但PEACH空姐比較有親切感。 錢方面，由於HK EXPRESS成日出平飛，照理會比較平。PEACH優勢係關西機場有自己的TERMINAL，出境快過正常國際線的TERMINAL。另外PEACH飛日本內陸超平，搭HK EXPRESS去大阪，補張PEACH去北海道，咁就非常抵玩啦。 更多遊記: 好想旅行 HoseungTravel
