日出日落，生活日常，有人話好悶，我肥碌則覺得，你自己唔為自己添生命/生活姿采，當然悶。但若你動下腦筋又積極，咁，可能日日好多嘢玩。 例如，為好朋友搞生日宴。可以粗粗地平平凡凡食係一餐，但也可以精心部署，令參與者個個享受超開心快樂的一餐。 老友「班長和」生日，好，又搞搞佢。兩個月前偶然貢到利舞臺廣場「海港薈」，咦，間貴賓廳有二十二人大枱喎合用，即訂。 地方有，立即拉住行政總廚謝江生師傅：一、唔該度張豐富菜單；二、請創作壽桃盤，千祈咪求求其其蒸籠包就算數。兩個月飛快過去，日子到，二十二人殺去，貴賓廳早布置妥當，菜式逐一上，嘩嘩，全部打卡之作，謝師傅呢餐，渾身解數！最難得佢蒐羅到一條六斤野生黃皮老虎斑，咁重身，要蒸到剛剛離骨，功力少一點都唔掂。魚頭魚尾邊個食？當然係主角！呢餐「建築林」最唔話得，將半世紀前儲落的鎮屋之寶—水晶樽裝金花XO獻出。一啖入口，你就知如今的所謂XO根本係「水貨」。生日宴，主角是壽桃，一出場個個嘩嘩聲，因從未見過陣容如此龐大的壽星公大拼盤(見圖)。經理細細聲講：「此乃生哥設計多時，再用三日造成㗎，將聖誕老人做模型再變壽星公，神來之筆也！」曾智華肥碌出馬 海港薈銅鑼灣波斯富街99號利舞臺廣場22樓港鐵銅鑼灣站 A 出口2110206867352988（Whatsapp)
