Minions: The Rise of Gru驚喜爆笑可愛笑足全場 一連三日公眾假期大家做咩好？結果我去咗睇戲，咁最近有咩新戲睇呢？其中一套焦點就當然係Minions: The Rise of Gru（小小兵2：格魯的崛起）啦，好多人都會話卡通片係比小朋友睇，但其實並唔係，例如櫻桃小丸子就講到明係比大人睇，每一集都有一啲寓意想表達出嚟。相信Minions小小兵都一樣，透過卡通嘅表達形式，帶出一系列嘅問題比觀眾反思。首先講返呢套戲，喺入場前係完全冇期望，因為大家都知道Minions 唔係好識講嘢，究竟製作團隊要點樣將一班唔係好識講嘢嘅Minions 融入電影橋段，甚至同主角犀利哥互相配合呈現出豐富嘅劇情，相當之考功夫兼有挑戰性。以下不含劇透：有幾點真係要讚吓嘅，首先嗰班Minions真係超級可愛，雖然佢哋真係唔係好識講嘢，偶然只會夾雜一兩個英文字，但係佢哋嘅表情非常生鬼，令觀眾好受落，就算聽唔明佢哋講嘢，依然係全場爆笑。第二，電影表面上係講一班小壞蛋，做一啲搗蛋嘅行為，獲得滿足感，但係背後應該係想表達團結精神，大家要守望相助同合作，先至可以將一件事做到最好，咁我都希望如果小朋友睇完之後，唔好學壞啦⋯⋯第三，雖然我冇睇第一集，但係睇第二集期間完全明白劇情，唔會有先睇返第一集先明嘅感覺。由於唔可以劇透嘅關係，其實都冇乜太多嘢可以繼續分享，不過推薦指數如果以10分為滿分，都會有9分推薦，如果大家想放假輕輕鬆鬆，唔使點用腦都可以笑返個幾兩個鐘，咁就入場睇啦！
