今日天氣好好，雖然濕度高咗啲，但係溫度低，間中有涼風，絕對係一個好舒服嘅天氣！但係自知長課不足，頭50K但求減少乳酸嘅積聚，淨係用一個快行嘅pacing。去到CP5，一切感覺良好，換好行裝，繼續出發！ 點擊圖片放大 上馬鞍山嘅時候，感覺仲有氣有力，一面上，一面load返起成段路嘅地勢，諗住落山嘅時候就追返d時間，唔知係咪因為心急，落山嘅時候feel到ITB想發出黎，即刻按返鬆就住落，點知ITB唔痛，就變腳踝痛，落到山腳涼亭，按返鬆返d就繼續去，上到基維爾問first aid站借按摩膏，食左d Pasta，就繼續跑，之後就慘不忍睹。。。 腳仔開始投訴，再加上唔知點解嘅胃痛，仲要低低能能咁跟人行錯路（明明一條麥徑點解咁都可以行得錯）幾經轉接，終於去到筆架山。。。筆架山嘅義工，都好窩心，見我坐低左，就問我有冇嘢要幫手，仲幫我鋪埋氈，即刻好想返屋企，有咁貼心嘅服務，不自覺地休息得耐左。。。 筆架山嘅CP實在太邪惡啦~ 一起步就黎料啦。。。乳酸出晒嚟，落山要靠pole落，痛到唔想再行，去到大埔道見到好多人喺度等巴士，有一刻衝動，不如算啦。。。不過已經行到73K ,差個少少，冇理由行埋佢㗎！於是用pole篤下篤下咁去城門，一面上山，一面問點解要自己攞苦嚟辛，負面情緒出晒嚟 去到城門，見到Supporter，諗起仲有個針草帽，真係好想返屋企。。。佢係咁話得返17K咋嘛，三個鐘行完啦。。。心諗我又唔係你，平時冇事冇幹，都要跑下先meet到呢個時間啦。。。更何況移家。。。就係咁，就俾佢推咗我出發喇 城門水塘CP，我唔想繼續啦.... 上針山嘅樓梯，義工用粉筆寫滿左打氣嘅字句，響意志力薄弱嘅時間，真係一個幾大嘅動力！去到草山，開始眼訓，迷住上山。到沿礦抝CP，睇一睇時間，仲有三個鐘，先到二十四小時， keep住行都應該夠時間返終點，快速補給後，又繼續起行。 上四方亭途中，都幾大風，好彩著左件Fresh Warm，保暖得黎又唔焗，一件啱啱好，而且我嗰件係連埋口罩，唔洗吹到面都痛 上大帽山嘅時候，已經係六點鐘，準備天光，對於嗜睡如命嘅我，周生急call，好似斷左片咁，意識都係行緊，但冇左靈魂，醉住上山。。。 差不多上到山頂，聽到打氣噹噹，呢個位都有義工！？辛苦曬，一定凍到死 落山好想jog落去，不過腳痛到一個點，連掂地都有d困難，忍唔住大叫，係咁同自己講最後一段啦，頂住啦！ 落到閘口，最後一段山路，落樓梯反而冇落馬路咁痛，而且聽到終點司儀嘅廣播，神經開始麻木，係咁同自己講：「到啦到啦到啦到啦」，去到公園位，好想跑落去，用平時嘅form又痛，即刻諗返起平時做drill點樣跳樓梯，於是就跳住落終點 衝線嘅一刻喊左出黎，唔係因為感動，係因為我隻腳真係好痛 衝線嘅一刻.... 有好野食，心情即刻好返~
