講到Adventure Race，第一件事一定諗到上山下海，十項全能~ 不過香港近年諸多制抓，如果比賽路線，就算掂少少水，地圖上嘅不明顯小徑，什至接近民居的海濱長廊，都會被政府拒批申請，以往一d特色嘅賽事，都變得更加難發展新路線...... 慶幸係，仲有一d搞手願意花心機時間去搞特別嘅比賽，就好似今次嘅XTE Adventure Terra Race 2017，可以俾我地呢d過度活躍兒醫下病 >W<~ 呢個Adventure Race包括越野賽跑，獨木舟，野外定向同一d神秘嘅挑戰，每年嘅路線都會唔同，而且賽前都唔會公佈比賽路線，就算比賽中途，都只能夠跟著絲帶，一步一步走去終點，如果中途miss左一條絲帶，就有機會迷路，所以除左體能，仲需要觀察力、智力、團隊合作嘅能力，先可以順利完成！ 賽前大約一星期，收到e-mail話烏溪沙係今次嘅集合點，我估計會玩馬大石澗，鹿巢山，梅子林，烏溪沙落艇，心諗，無死啦，住馬鞍山咁耐，都探過唔少路，點都估到自己去到邊掛，不過話明係Adventure Race，又點會咁易估到呢！ 烏溪沙YMCA > 白石 > 後花園 以為最熟悉嘅地方，就響最熟悉嘅地方浪費左時間.... 事關有一個本來係向前嘅指示，俾人改成向左，於是大隊都剷左入林。。。 我地足足花左15分鐘去探路，有d參加者繼續向前，有d就按兵不動，我地就繼續搵路，點知搵返條正確嘅路之後，就由隊中頭變左隊尾。。。 焦急嘅心出曬黎，上斜不能太快，但都不能不追，一路默默地行上馬鞍山郊野公園 後花園>馬大石澗 終於由大路入林，一個密密麻麻嘅竹林，好快咁追出去，然後衝住落澗！ 落澗係特別興奮，我地左跳右跳，攀高攀低，好彩隊友強項就係石澗，追追趕趕下，總算追返大隊~ 馬大石澗 > CP1 > 鹿巢山定向 收到地圖，plan好路線，4>2>1>3>5>6，set map，Go! 我地揀左一條好好嘅路線，不過上第一個point前就俾狗圍，好彩我唔怕狗姐，不過都急急腳走，真係有d驚嚇！ 上到山，我開始冇咩力，於是隊友就上去搵point先，我響後面望住佢背影，心諗點解可以咁快嫁。。 。 一路跑，一路keep check住路線，有路不越野，所以好順利咁完成曬成個定向，落返梅子林 鹿巢山>梅子林>女婆山 已經10K啦，心諗：「仲唔係落返馬路，返烏溪沙？」，世事邊有咁順利，響一個身上得返100ml水嘅moment，竟然係上女婆山....即刻有d崩潰... 好想飲水，但唔敢飲水，唯有濕下嘴唇，慢慢肴上去.... 雖然係咁，但最曬最熱嘅時間1K上180M....結果我都係未上到頂就斷水.... 見到隊友，我都忍唔住問佢仲有冇水丫...... 落山速度都快唔到，因為左腳ITB開始痛..... 見到有繩沿路落，已經忍唔著即刻帶手套abseiling落，500M落220，落到底隻手套已經燒走曬d膠點，可想而知，其實都take左一個幾大嘅Risk..... 女婆山>富安CP2>爆林上山>大水坑>馬大 經過女婆山一戰，黎到CP2就裝滿水先敢上路，已經15K，今次仲唔係直回終點？。。。咩話！？又爆林.....!? OK.....仲要落返馬大!? 見到真係有d灰......一落澗就仆左落水，平時跳到嘅石，都冇力再跳，掛住左響舊大石度.... 真係呢... 馬大>大水坑單車徑>。。。 終於出返黎，見到單車徑，仲有半個鐘cut off，仲唔係返終點落艇!? 沿單車徑跑返去，應該仲趕到嘅... 雖然跑起上黎係痛嘅，但係都keep慢jog住，不過去到有一刻，我不得不放棄，因為....又上山!?明明平路返去都要趕頭趕命，仲要上山，唔係丫..... 不斷說服自己，最後一段啦...頂住頂住，行下行下，發現自己去返一個熟悉嘅地方，O~後花園，一定係原路行返去啦，係嘅係嘅!!! 錯啦，都話世事真係唔會咁順人意！行到差唔多利安嘅位置，唔知邊度突然間多左條路，爆林爆到落條乾澗......又澗!?忍唔住都要講句：「係唔係咁抵玩丫？」呢條澗一路直出西澳，我地就再出泥涌，係唔係落艇啦？我隻腳就快要報銷啦.....一路沿海邊行，一路同自己講，好快唔洗用腳啦！點知......路嘅盡頭係...綑邊.... 平時見到一定好開心，因為係我嘅天下，Ha Ha Ha! 不過呢一刻見到，真係想喊出黎....明明做得到，但盡左力都做唔好嘅感覺......十級崩潰..... 行左3分1左右，我已經放棄，直接落海行，我相信我識游水的話，九成九會直接游過去，去到最後，上返岸，已經頹曬，一路行返去，去到獨木舟CP，已經cut off左，於是跳左落水清一清自己嘅情緒，清一清沙石，我地就除鞋行返終點.... 返到終點，等頒獎，諗著睇下高手用幾多時間完成呢個比賽， 點知......竟然俾我地好彩咁拾到個季軍 呢個速度都拎到獎，真係估你唔到 呢個比賽真係好甘，不過好值得去玩，特別係一d鍾意挑戰自己，而且有一定山野技巧嘅人玩！希望各位 搞手會繼續搞多d特色賽事，希望Adventure仍然係一個充滿挑戰、探索的代名詞！
