今次既$199海南島四日巴士團，真係一個難忘之旅，亞媽大整惑之一既另一創舉~ 話說~妹妹提議復活節有4日假期，不如去大陸玩幾日，於是就由最得閒個位去報團! 從此4日惡夢就開始發生在我們這一家身上............. 晨咁早5點鐘起身趕去福田口岸集合，唔單止又迫又多人，仲要有人遲到，足足等左2個鐘先可以上車~ 搭左幾個鐘頭車終於可以開飯，但我可以話比大家知，呢餐飯係整個行程最好餸同最好食~ 呢度係餐廳後門，好有鄉郊氣息，我諗我已經離開左市區了!!! 之後5日既早午晚，日日既菜色都差唔多，都係冬瓜炒冬瓜，南瓜炒南瓜，每餐只係分到一、兩舊肉，岩哂食素及減肥人士食~ 經過十幾個鐘頭車程後，個人已經散左，原來仲有仲有撘船呢關先可以到達海南島，但個陣已經係夜晚12點，仲要係度等左2個鐘先可以上船，而且架船又有人食煙又有蚊咬，又焗又臭，真係好難頂...返到酒店時已經係凌晨5點，訓2個鐘又要起身，唔訓好過訓。 點擊圖片放大 第二日海南島無良導遊(睇埋落去妳地就會知佢幾咁無良)，叫我地加$398人民幣參加自費活動，其實我地一早預左好比，因為咁平既團費一定係蝕做，靠自費活動報貼，但比都唔係問題，但D自費活動真係好呃水，去埋個D貝殼館、蝴蝶館等等而且逗留唔夠15分鐘又話要走，咩都睇唔到~~ 係度睇既表演我覺得係成個行程最精彩同攪笑~ 點擊圖片放大 +14 係呢個碼頭勁多亞姐攞住D鱷魚、海龜搵$$，同佢地合照每位收$5人仔~ 我冇幫襯因為覺得佢地好可憐，冇得落水曬到乾哂~ 點擊圖片放大 +3 之後再坐木伐，木伐上面有多支自制水槍比你射其他坐木伐既人，起初我地都唔想濕身冇玩，但後來划木伐既人成日射我地，我地先玩，原來佢咁做係有陰謀，玩完先同我地每位收$10，玩之前又冇講要收$，D人真係唔老實，咁又比人昆左幾十蚊!! 點擊圖片放大 +12 係海南島逗留左2日，差唔多有1日半時間去呢D購物點，有茶葉、竹炭、假珠寶、咖啡、刀等等，我們這一家當然冇咩幫襯，但我眼見好多團友都有買野，但個無良導遊仲話我地成日幫襯街外D假野，仲話會食壞人，勁黑心~ 之後仲話我地留得耐(你又唔叫我地走，D自費活動又吹我地走)，其他團已經行左8個購物點，我地只係行左5個太慢喎~ 點擊圖片放大 每晚宵夜係指定動作，但好不幸有一晚我地都比一昆左~ 點擊圖片放大 +2 以上既海鮮都唔係好貴，下面呢碟唔知咩螃先至貴~ 呢碟野要$650人仔，味道冇特別只係爽口，但價錢足夠我去五星級酒店食自助餐，但我地只係係大排檔食~~ 到左第四日無良導遊把握最後機會再去一個購物點，一留就留左成2個鐘，無良導遊又以趕船期既理由午飯都慳返唔比我地食趕我地上船(又要食杯麵)，落船再搭12鐘頭車先返到皇崗，返到屋企已經半夜2點，第二日仲要返工，真係貼$$買難受~ 所以大家真係唔好以為$199好抵(可能有部份團友冇JOIN自費活動冇比人昆會好抵，但要受無良導遊既氣)，其實又要比導遊費又自費活動又比人呃下又餐餐加餸買杯麵，成個行程每人都用左$1600(可以參加2日1夜大陸或澳門豪華團)，但慶幸識到2個好玩既團友一齊玩，係車上玩玩啤牌解下悶~ 以上個位就係無良導遊，佢仲叫我地叫佢"李導"又成日係架車度講人生道理叫我地買野，完全唔係介紹海南島，只係同我地思想改造，佢真係當左自己係國家"領導"，但實際佢只係一個小小既賤精 (導遊) 大家可以點下佢相!!
