踏入2020年,真係忙過不停.本身要執屋準備過新年.後來就要不停訂口罩和消毒用品,完全無曬自己時間. 今日終於可以抖下,有時間更新下個BLOG,紀錄一下之前去福岡旅行既點滴. 最近一次去福岡,係2019年12月.天氣無想像中咁凍.氣溫大約有15度,如果行室內有暖氣,連外套都唔使著.而今次既重點行程,就係去摘士多啤梨.由天神開車去,大約45分鐘. 去到農場,首先要入一間屋仔登記,比錢.之後職員會比剪刀和膠袋我地,再帶我地去摘士多啤梨. 摘士多啤梨既地方,係室內,所以落雨都唔怕.今次旅行,咁啱就係摘士多啤梨呢日落大雨.好彩係室內地方,所以無影響我地既行程. 雖然D士多啤梨,唔係想像中密密麻麻,但其實都好夠食.比完錢開始計,40分鐘任食.我地當時食左20分鐘已好飽,之後同小朋友影下相,教下小朋友自己摘,都係一個幾好既體驗. Joseph自小就特別喜歡生果蔬菜,出街寧願行超市多過玩具部.所以今次可以黎摘士多啤梨,佢超興奮.之後仲不停提住"士士",即係士多啤梨. 農場對面仲有間CAFE,大多數人黎到呢度摘士多啤梨,都會順便黎食件CAKE,坐下HEA下. CAFE唔止有多款蛋糕出售.仲有好多士多啤梨產品.好似係果醬,曲奇餅,糖果等等. 當地人係CAFE食完,仲會買多幾件蛋糕拎走,可想而之d蛋糕有幾受歡迎. 一場黎到,我地都要試下D蛋糕.蛋糕質地濕潤,夠水份.忌廉又香又滑,再加上非常新鮮既士多啤梨,好食過百貨公司好多. 另外,仲試下獨立包裝的水果乾蛋糕.呢款都係非常推介.食得出非常新鮮,而且十分足料,每啖都食到甜甜既水果乾,真後悔沒有買多點回來. 如果冬天來福岡,我覺得不可錯過去摘士多啤梨.現摘現食真的非常不同.士多啤梨不只更鮮甜,而且是很脆身的,這樣的口感,跟超市買到的大不同,要親自來食過,才知道什麼是新鮮.特別是帶小朋友來一齊玩,是個很難忘的體驗. 最後一提.如果要去福岡的農場摘士多啤梨.大多數都需預約.所以出發前就要先排行程,網上預約好到訪日期和人數,不然摸門釘就非常掃興. 歡迎聯絡: candy_y_i_p@yahoo.com.hk
