有一間位於佐敦嘅日式小店，新開冇耐已經吸引咗好多人去幫襯。店外掛咗幾個又藍又紅嘅燈籠，加上一大張印有唔同海鮮丼相片嘅海報，真係好難會留意唔到喎。 店鋪細細間但裡面嘅裝潢富有日本漁市場色彩，仔細再睇發覺打卡嘅地方都唔少😆😆，真係令人懷念以前去日本🇯🇵旅行嘅一點一滴啊。 餐牌上嘅海鮮丼選擇佔了兩大頁，分類寫得好清晰 - 海膽、雜錦、三文魚等等。其他日本食物例如刺身、壽司、小食當然唔少得。我覺得最特別嘅係有「自選魚生飯」，自己揀嘅配料一定啱胃口。 ▫️雜錦海鮮丼飯 (HKD158) - 三文魚、油甘魚、帶子、北極貝、赤蝦、蟹籽及玉子燒。店家選用日本米，有好香嘅醋味。喜歡嘅話可以叫店員幫你加添加醋飯(無限添加)。赤蝦夠大隻而且仲好鮮甜。雖然碗飯係細細碗，但有多款刺身及高質素來作賣點，絕對對得起呢個價錢。 ▫️明太子雞翼 (HKD68) - 將明太子釀入已去骨嘅嘅雞翼，外表漲卜卜，入口啖啖肉，用嚟送酒就最正。 ▫️鰻魚玉子燒 (HKD78) - 自家製玉子燒總共有4款選擇咁多！厚厚玉子包住豐富餡料，鰻魚惹味得嚟唔會油膩🤤 其他食物有👇🏻▫️腐皮壽司 (HKD12)▫️加州反卷(HKD68) 新張期間無論堂食或外賣都有優惠呢👇🏻⭐️堂食自選魚生飯八折，只限星期一至四12:00-17:30 （假期除外）⭐️外賣優惠 (此優惠只限壽司): 滿 $150減$20， 滿 $300減$70， 滿 $500減$150優惠期有限，有興趣嘅話就好錯過啊。
