雖然築地場內市場已經搬咗去豐洲 其實我覺得想食嘢嘅話築地場外市場都有好多選擇 可以一路行一路喺檔仔買嘢食 (掃街) 或者好似我咁搵間食店坐低食又得 ⠀⠀⠀⠀⠀⠀⠀⠀⠀ 「北海番屋」我bookmark咗好耐㗎啦 今次終於可以食到 早上10點幾去到店舖門口 唔洗等位 店內已經有幾個日本男人用緊餐喇 ⠀⠀⠀⠀⠀⠀⠀⠀⠀ 打開餐牌就見到多款海鮮丼圖片同埋價錢 我係一心想食海膽丼㗎 都冇考慮餐牌上其他嘅海鮮丼 就點咗我最想食嘅海膽 等咗大約5分鐘就見到我碗海膽飯啦～嘩～好多件海膽鋪滿喺碗飯上面呀 未食落肚就咁見到都好開心！ ⠀⠀⠀⠀⠀⠀⠀⠀⠀ 海膽嘅味道簡直creamy到不得了 又夠新鮮 價廉物美 (うに丼 ¥3,500) 真係只有喺日本先食到！食完碗海膽飯之後真係好飽 可能係喺短時內食咗咁多海膽 感覺有點飽滯 北海番屋 vs. 虎杖 vs. 鮨國？ 相信有好多人都會比較吓呢三間同位於築地場外市場嘅海鮮飯 我只係食過北海番屋同埋虎杖 虎杖喺築地外市場有多間分店 我嗰次去都係食咗海膽丼 老實講啲海膽質素真係麻麻地 啲海膽出晒水同埋味道好苦 見到都唔開胃 網上嘅評語都係好壞參半 睇嚟要食到新鮮海膽要靠運數 ⠀⠀⠀⠀⠀⠀⠀⠀⠀ 鮨國喺正北海番屋隔離 所以都行咗過去睇吓佢哋放喺門口個牌 門外有個女人不停叫途人入去試吓 比起北海番屋就冇人企喺門口搵生意喇 鮨國賣嘅海鮮丼售價由¥3,000起 (另加稅) 我未見過實物所以唔知道佢哋嘅定價算唔算抵食 有機會嘅話我諗我會試吓嘅 ⠀⠀⠀⠀⠀⠀⠀⠀⠀ ⭐️提提你：店舖「定休日」係「不定休」想去食嘅話真係check吓先好去 北海番屋 東京都中央區築地 4-14-16 Follow me on IG: https://www.instagram.com/camera_eats_1st
