岩岩玩左個遊戲, 我會形容佢係用箭做武器既室內War Game. 如圖: 朋友邀請玩Game, 遊戲名(唔係公司名) 叫做Archery Tag. 之前電視睇過下介紹, 知道大概係......箭做武器既game (當時未意會到係war...只係當佢係個game...)...... 而呢個武器既特點係...箭個前端有個好似壁球咁既波波...(如上圖底部果枝) 一秒鐘閃過對於呢個名詞既認知後, 下一秒就問朋友: 痛唔痛架? 朋友話: 唔痛, 不過好累。 再下一秒: 好丫, 預我。 呢篇文唔打算仔細介紹玩法同安全措施, 有興趣請自行Google. 簡單咁講, 就係分左兩邊場地,兩隊人各自攻擊對方隊員, 以"殲滅"對方為目標。 箭打落人到, 人就"死"。(職員用左呢個字眼黎描述) 一場戰爭, 五分鐘。 面罩下, 我感覺到急促既呼吸, 同埋由心發出黎既卜卜聲。 我諗腎上腺素應該上到頂...... 果五分鐘裡面, 腦裡面既意識只係有: 攻擊 同埋 防守, 懶理你前面既係乜水。 五分鐘之後, 離場休息, 即時全身攤軟。 完左一場, 五分鐘後又下一場。 未入場已經呼吸急促, 呢個時候, 阿張家輝(喺腦入面)同我講: 怯, 你就輸...... 就係咁... 一場又一場... 遊戲完結, 係好令人振奮既時刻~! 呢個遊戲 好。好。玩。 熱烈推介佢作為Team Building既活動。 想像下, 一隊人瑟縮喺掩護物後面, 邊個會負責攻擊, 邊個負責掩護, 邊個負責後援。 一個掩護物係咁大就係咁大, 你企喺正中間, 左右前後既隊友會唔會突左個Pat出黎做靶呢? 前場打到落花流水, 有無人負責後場執箭補給? 隊友"死"左, 你會幫佢打復活靶, 定係繼續無定向攻擊對手? 嘩~ 不得了, 盡顯真性情既戰爭遊戲。 喺呢個Game入面, 怯, 唔洗輸一世既。 不過玩完再諗返企喺掩護物後面既自己, 會更加了解自己係個咩人。 BTW... 幸運地無中箭, 唔知中箭痛唔痛。 不過熱烈地奔跑過後, 左脾同右脾好痛囉...... 真係温馨提示, 記得運動前熱身, 運動後拉筋。