The Train from hell 兩年前看左一個Discover Channel既旅遊節目，係Anthony Bourdain主持，介紹緬甸，其中一部份就係講由仰光坐火車去蒲甘。果個旅遊節目印象好深刻，個主持系車度又煙又酒，但因為極度唔舒適既關係，黑曬面！ 講起火車，我有情意解，小時候我乘搭了好多次廣州至上海的火車。火車車程唔會短啦，差唔多20年前，早上出發，第二日下午先到。這是小時候開心的回憶，火車上有的訓，沿途又有唔同野食，風景都好唔錯。大過左好少有機會乘搭長途火車，難得今次有時間有機會當然不能錯過這次火車體驗機會。 仰光至蒲甘列車已經行駛左差唔多一個世紀，係以前英國殖民時所建做。依家緬甸火車有個好得意既地方就係好多車卡上寫有日文字，因為依家好多火車頭和車卡係由日本捐獻來的。 每天都有至蒲甘的班次，每天一班，下午四點準時出發，第二日早上大約11點到達蒲甘。一路上可以欣賞沿途青蔥田園農地景色，鐵路旁當地人搭建的簡陋住處，更有非常美麗的日落風景！途中平均每隔兩小時就會有停站，站頭有許多小販售賣各種當地食品。不用擔心餓肚皮，當然前提係乜都夠膽試啦！ 點擊圖片放大 +2 好既地方講完啦，講返D恐怖野啦！地獄號列車唔係浪得虛名，出發前問左當地親友，全部都無嘗試過乘搭哩班列車。但他們聽返來都係好恐怖，加埋之前看到的旅遊節目我都預左哩17小時的路程一定唔會好過。 三點半去到站頭，見到好多當地乘客，都有唔少來自唔同地方的Back Packer.提醒 Lonly Planet哩本旅遊書並不建議遊客乘搭火車去蒲甘，相信D Back Packer都係抱住挑戰既心態，見識下哩班火車有幾恐怖。四點準時出車，頭一小時都係係仰光市內循環線既鐵路上，車速非常慢。但已經感受到列車的搖晃程度，和欣賞到車卡於車卡之間鋼鐵碰撞的刺耳響聲，我亦清楚明白到這種響聲會陪伴我這次的17小時旅程。 trim.54F63492-1884-4EAB-9F0C-85CA8C89A8F8 隨著離開仰光市區，車速逐漸加快。列車的顛簸，搖晃程度加劇。顛簸和搖晃係唔同既，OK！顛簸係上下咁Chok，搖晃係左右咁搖。就好似去旅行坐大笨象和騎馬既感覺，不過程度強十倍啦。上下chok時會感覺屁股拋離左座位，左右搖時會需要扶住附近把手。但要記得依家係坐緊既係一架火車，唔算行的快既火車。好難形容一架火車可以點樣不斷搖緊和Chok，十分擔心會唔會飛出軌道。 當我習慣了顛簸和搖晃和刺耳的鋼鐵摩擦和碰撞聲音後，以為哩班列車都唔係太地獄節。當太陽一落山時證明我估計錯誤。當欣賞完壯觀的日落景色後，天色逐漸變暗。就在這個時候大量的飛行蟲類會不斷飛湧入車廂。大量飛行蟲類既意思係以我淺薄的認知係完全形容唔曬有幾多種類，記憶中有蚊，蜻蜓，飛蛾甚至飛蟑螂和蝙蝠。 略略一提，車廂係無冷氣。我有嘗試過將窗戶關閉，但需要明白那種侷促既氣味更加難以忍受。由黃昏六點後就伴隨著這些擾人的飛行昆蟲一起旅程，數量之多可以見到這些飛行物在車廂內的燈光下形成了漩渦。夜深時嘗試閉起眼睛小睡，臉上不斷感覺有撞擊和爬過的感覺，根本難以入睡。這場噩夢持續到第二日日出！！ 這是一個以體驗和挑戰的心態選擇乘搭火車來到蒲甘這個著名歷史名城。大部分遊客都會選擇乘搭飛機，仰光飛往蒲甘只需一小時，內陸機票價錢都唔貴。想想經濟少少，長途旅遊巴亦是唔錯選擇，只需9小時。都是豪華大巴，有冷氣，唔會有擾人的飛行昆蟲。行高速公路唔會上下或左右係咁搖！而且巴士班次好密，最重要係可以安睡！ 今次地獄號列車之旅係我哩一世最難忘的火車體驗之旅。唔知仲有無機會在其他東南亞地方再次嚐試到，始終火車觀賞到的風景最豐富，亦能近距離見識到當地風土人情。 如果有機會，又有時間我都會好有興趣體驗下其他各地的火車體驗。（除左印度。。。。。自問勇氣唔夠上車頂） Facebook Page: B&W Travel Life
