眨下眼就第四日,雖然仲未走,但已經好唔想離開布吉呢個世外桃源,好唔捨得喇,今天我地會去PhangNga果邊玩激流,滑梯,等等嘅活動,保守估計玩完之後應該會攰到叔叔不行鳥,小弟非常期待今天的活動。 Day 4: 餵馬騮 -->騎大象-->ATV-->空中飛人-->滑梯-->激流 朝早我地如常喺酒店食早餐,今日呢間係叫野食加buffet形式,我地就覺得全自助比較好,因為可以自己控制份量,但叫嘅話,唔知佢俾幾多,例如我地叫waffles,佢就一人俾4塊,所以到最後我地係浪費左好多野,自己都覺得唔好意思。 食飽之後大概8點車就黎喇,今日呢架係全日跟住我地,而司機就係導遊,車上的客人就係我地今天全日的團友,其中坐我地前面嘅係一個同奧尼爾差不多身形的外籍女人士,佢今日都幾慘。 大概45分鐘車程,沿途見到幾座好特別嘅山,個山嘅外形不是斜上去,而係垂直90度,我估佢可能都係一啲景點黎,不過我地就冇落車影相,而係準備到達第一個景點-馬騮山。 馬騮山個山洞入面有一座大佛,而我地就冇入到去,反而留在外面餵馬騮,這邊的馬騮大多都不會搶野食,佢會乖乖地等你餵佢,小弟開頭都有啲驚,但見到女小編餵完都冇事我就走去餵下囉,啲馬騮真係勁,三兩下手勢就可以剝完蕉皮再食埋,我呢隻馬騮實在甘拜下風 呢度應該有過百隻馬騮,佢地隻隻都札札跳,成隻甩繩馬騮咁,但一有野食就會默默地望住你⋯⋯其實有啲都會唔乖,成袋蕉攞左去,不過佢地冇攻擊性嘅,想搵兩餐姐。 餵完馬騮就出發去營地,一個鐘車程就到營地,我地先去騎大象,呢度騎象比芭提雅騎抵好多好多,一隻象坐到3個人加一個馴象師,而頭先講果位外籍人士就一個人坐一隻,大象辛苦你喇!! 點擊圖片放大 喺度騎象會上斜落斜,行溪間,去到一半路程左右,馴象師會落地,比我地自己騎,佢就會幫我地影相,今次係我第一次坐喺象頭上,原來象有毛,真心唔知道,騎在頭上比椅子上攰,因為比較DUNG,仲會驚跌雖然其實好搵陣。呢度嘅大象好乖好聽話,啲馴象師發施號令啲象就會跟住做,沿途都冇打過佢,當然平時點訓練我就唔知,希望啲馴象師唔會係打得佢地好勁先變到咁啦,同埋我見佢地都幾自由咁通山行,食野,不像馬戲團的困在籠內。 騎大象嘅時間接近50分鐘,係真係好抵,有機會必定再黎探佢地,阿el下次再見喇。 騎完大象就去玩ATV,一個驚心動魄嘅旅程即將開始,ATV不是亞洲亞洲,而係越野電單車,途中要攀山涉水,越過高低起伏,少啲吉士都唔敢玩。一開始嘅時候,我地第一個難關就係要有勇氣帶住一頂應該廿年冇洗過嘅頭盔,臭過屎。 我地克服左第一關之後就開波,一開波見前面個女人衝埋棵樹,真係嚇餐死,好彩佢冇事,我地嘅女小編一開始講左一句好似唔係幾刺激,結果一秒後佢收番,前車一比油啲沙塵會兜面車埋黎,所以切忌跟車太貼,除後啲路都係起伏好大,會遇到大石,要俾油先可以越過去,否則會kick住行唔到,快得濟又驚衝到唔知去邊,所以好考技術架,差唔多去到未尾,個女人又控制唔到,剷上舊石,架車翻左一半,好彩無翻到喳,如果唔係無得賠,因為一開始已經講左,係你自己要承受風險。 玩完車跟住唔好比佢停,繼續去玩,跟住玩嘅呢就係空中飛人,由一棵樹飛去另一棵,呢個玩之前好驚,但玩完覺得無咩料到,不過都值得一試嘅玩完呢個我地都仲未停,三個後生玩極速滑梯,呢個梯去到尾聲會升起,所以滑到尾就會飛起,喺空中停留4秒左右,我地都喺4秒擺出唔同post,然後撻落水,我用撻因為落水果下好似俾人揪埋黎,結果大脾痛左幾日...我地一人玩左三次,已經喘氣,即使佢話可以再玩我地都冇玩 點擊圖片放大 +2 差不多一點我地就食晏,都係果啲飽肚就算嘅野食啦...食飽之後就係惡夢嘅開始,話說我地去玩激流,我地隔離果兩隻艇嘅內地人士,不停潑水,你地玩就好啦,唔好搞到我嘛⋯⋯佢地仲要好鬼開心,十足古皇帝酒池浴淋嘅情境,或許是我對開心的要求太高吧!!! 等左成半個鐘,終於開始,我地將會玩7公里,頭5公里會比較易,之後就會難度升級,實在係膽量嘅挑戰。雖就頭5公里比較易,但我地已多次跌低,我地全部人都係坐喺船邊,只有一條繩做支撐,所以好容易就向前傾。去到5公里,開始難度上升,急流再加上落斜,連划船人員都難控制佢,結果Machi跌倒,大家都好擔心,因為佢隻手指腫過隻雞蛋,同時證明考St. John係為考而考的,實戰係不能派上用場,好彩集合地點有冰,可以幫助消腫,如果唔係仲辛苦,番去酒店間,Machi仲係好痛,我地又幫唔到手,心裏只有無奈... 番到去酒店,好彩酒店有醫院,雖然都幾貴,成千蚊,不過都一定要睇因為唔知有冇裂骨,經醫生疹段,應該只係屈到手指,沒有想像中嚴重。睇完醫生就番去酒店休息,沒有去第度行,Machi覺得不好意思,但其實我地又有咩所謂,唔通痛都要你行黎行去咩!!! 夜晚我地又出番去PanBistro食,今次去到冇位泊車,結果要泊喺人地舖出面,好彩人地冇拖走我地架車!!!我地今次叫左生蝦(最後再食多碟),西班牙火腿Pizza,魷魚,爐魚,炒河,全部都好好味,朋友黎嘅話我會一定介紹俾佢地,價廉物美仲有得睇波,去邊度搵呀!!! 點擊圖片放大 +4 食埋布吉最後晚餐,就番去執行李,準備明天回國了