小弟剛到布吉玩左5日4夜，藍天白雲，椰林樹影，海水清澈見底實在可以與馬爾代夫相提並論，今次旅行我選擇左自駕遊，此前從未試過，所以不斷在網上搵一啲關於自駕要注意事項，亦因為咁，我發覺原來相關資訊不是太多，所以就決定開呢個專頁。 Day 1: Central Festival--->BigC--->Patong 一朝早我地因為要坐10點泰航嘅機，但係我地有5個人，所以喺前一日已call Van仔，原來Van仔仲平過的士，又安全準時到達，下次可以再考慮10。點航班不算太早，所以整個機程都冇訓覺，✈️✈️泰航上的飛機餐比其他的為好味，但空姐的質素就睇得出係女人。 經過兩個半小時嘅機程終於到達布吉國際機場，一去到第一個感覺係機場頗為殘舊，而且算細，不過好彩就係細得黎容易搵我地租車間公司，今次我地租左Toyota7人車，一去到俾本passport佢做啲手續，再聽佢講下啲賠償問題，就去拎車車。拎車嘅時候我建議自己影低哂架車，再係咪都話呢度有花痕，保障自己，同埋最好租一架有GPS嘅車會好啲，因為有啲地方用電話gps無咁準，不過最重要係叫佢教你用。 今次我地入住酒店叫Angsana Laguna，距離機場30分鐘左右，但因為第一次自駕所以用左差唔多一個鐘先到，沿途差不多一條直路，不過要留意cut線要望清楚，因為啲電單車會不時喺妳旁邊閃過。一去到酒店lobby已經嘩左一聲，其實呢間酒店係一間resort,有幾層高嘅酒店亦有獨立屋Villa型式，而我就選擇左Villa，因為都只係二千四一晚，3000尺連私家泳池，再背向哥爾夫場，基本上環境係無得輸，而且有人接待我地去間Villa，簡直覺得自己變左李嘉誠。呢間villa有2層，樓下係私人停車場，有單車供應，客廳，免費wifi（好緊要），樓上兩間客房，一間主人房，全部有露台，望出去真係好舒服，而且每天都有人打理房間同泳池，淨係酒店已經令愛上布吉。 我地放低行李就即刻出發去Central Festival， 因為開始肚餓同埋已經4點幾，去Central呢段路會經過一個Premium Outlet, 但我無入到去因為真係好肚餓，路途中有啲小插曲就係遇上整路，原本GPS話直行點知整緊，惟有轉灣行第二度，好彩GPS即時俾另一條route,如果唔係都唔知點去...Central Festival個停車場一入去佢俾張卡你，如果你買左野就出示單據就會免費5小時，唔買都免3小時，原來Central都幾多野行，不過入去前係要安檢，呢度個格局似香港西九龍中心，有啲'街邊檔'賣平衫，泰國特式衣服，生果形狀的肥皂，鍾意運動嘅朋友可以到Supersports行一行，入面有泰國球隊嘅波衫，亦有各大聯賽波衫賣，如果準備潛水，果度都有好多用具可以買，價錢應該比香港平，個商場都幾大，就算不喜歡行街都可以行兩個鐘左右。講番食野，我地去左個foodcourt食，唔好睇佢舊舊地，啲野都幾好食，佢果度係買張儲值卡然後在各商舖扣錢，我叫左個冬陰功泰國米粉，10蚊港紙，你無睇錯，係10蚊，仲要係好味果下衰，佢啲米粉俾香港的粗少少，有啲咬口，加埋個湯正呀，最後我食左三碗。其實果度仲有海南雞飯，壽司，果汁店等等，價錢都相當便宜。 下一站我地就走左去Big C，十萬個記得記得記得要駕車過去，因為我地跟據Google map講話行去8分鐘，駕車4分鐘，結果行過去要20分鐘，激死左。點解要去Big C呢，係因為泰國可能好多人唔知佢地嘅牙膏牙擦，一啲藥用物品都俾香港平，而其中一隻P字頭嘅咸味牙膏更加係我多年黎嘅首選，唔係吹大，係佢一擦完啲牙即刻白哂，唔信自己可以買番支試試，最後我地掃左30支嘅，一支30蚊港紙，Original同Whittening 最好用，呢度嘅Big C應該同外國大型超市差唔多大，行兩三個鐘都可以，如果買手信我會推介Big Boss Seaweed因為攞到番公司個個都問邊度買，無負評係第一次。不經不覺我地買左成2000蚊野，仲一次過換左60個印花再用印花換左兩把刀，起初個職員話會過唔到關，最後我地都過到。買完野攞住9袋野，呢度膠袋係無收稅，所以可以任攞，當然我無咁做，之後行番去central攞車，沿途其實無行人路，我地喺路邊行都有啲驚驚地，好彩最後都順利攞車出發下一站，呢個時候都8點半。 由於我地想聽日去玩水上活動，所以就駕車去Patong睇下有冇當地旅行社，去巴東條山路好斜，差唔多45至60度，所以真係要小心駕車，不能開太快，否則後果自負。半小時車程好快就到，好好彩入左間旅行社，佢俾左幾個島我地揀，可惜我最想去嘅斯米蘭島由6月至11月封島，所以我地揀去珊瑚島加皇帝島，價錢跟只係去一個島一樣，佢包車接送來回酒店至碼頭，所以好抵玩，因為玩到攰都唔想自駕⋯⋯夜晚果餐，個staff介紹我地去一個夜市，呢個夜市(Loma Market)有燒野食，有炒粉麵，即叫即刻喺露天炒，落油果下睇住啲火飛上一層樓高，夠哂鑊氣，不只一檔係咁，幾檔都係，我地叫左個菠蘿炒飯，炒河粉，又係好食嘅，有機會可以一試無妨。話說行去夜市中經過一間賣波衫，我問下佢李城波衫幾錢，佢話500銖，我開價200佢say no，之後佢減到400我都唔買，因為我相信其他地方一定比他平，事實最後證明我是沒有錯的hahahahahahah⋯⋯話咁快一天就完結左，番去酒店嘅路仲要黎多個考驗俾我，就係摸黑駕車，我未試過成條路黑哂得番我一駕車，好彩最後安全番到酒店，番到去訓4個鐘又要出發去玩水喇yeahhhhh。 點擊圖片放大
