屋企檸檬樹有兩個巨檸檬要收，於是整咗大B最愛嘅cheesecake。呢個cheesecake係不用焗嘅凍餅，我今次用嘅係8吋方盤，你可以用8至9吋圓盤都得。我冇落魚膠又冇加粉，所以大家如果怕天氣熱個cheesecake唔夠firm有D難切可以唔脫模直接筆出嚟，或分十份八份用細杯仔或cupcake紙杯整。出嚟效果好creamy好治癒，最啱喺呢D無聊假期時整嚟食。 另外因為檸檬係我種嘅所以無爉可以用個皮。你可以去D organic shop搵無爉嘅，又或者可以唔用個皮。而如果無原條雲利拿支，可以改用雲利拿油。 材料： 消化餅碎200g (可買現成餅碎或用200g餅打碎) 砂糖 1湯匙 幼鹽 半茶匙 無鹽牛油 80g Cream cheese 兩包(室溫放軟）。約450g 鍊奶 300g 檸檬汁 80ml (大約三、四個正常檸檬) 檸檬皮刨蓉 3、4個檸檬皮份量 雲利拿支 1支 (或半茶匙雲利拿油) 打發用淡忌廉 120ml 做法： 在模內先鋪焗爐紙備用。如用不可甩底模具，可以在模邊留些紙口方便抽起蛋糕。牛油用熱水坐溶或用微波爐煮溶備用。雲利拿支開邊，用小刀刮出籽，備用。 將餅碎，砂糖及鹽拌勻，加入牛油溶液拌勻。倒入模具並平均壓平在模底，成為蛋糕的餅底。放入冰格約15分鐘或雪櫃約一小時雪實。 將cream cheese、鍊奶加入大碗內打發至幼滑(如用廚師機或電動打蛋器，只需5分鐘)。再加入檸檬汁、檸檬皮及雲利拿油打勻。 在另一乾淨的大碗放入在雪櫃取出的忌廉(一定要夠凍才打發得起)，打發至企身。倒進3再輕力稍為千色拌勻。不要過分攪拌以免之前打入的氣泡流失。 在雪櫃取出模具，將4倒入並抹平表面，再放入雪櫃雪過夜即成。如果想快一點，可以改為放入冰格雪一、兩小時。 享用前先用刀在模邊𠝹一下，會較易脫模。
