呢排社交媒體充斥好多可怕嘅短片 😱 ~喺商場,有人打到人重傷;喺車廂,有人互毆,有人跳「鋼管舞」;喺條街,有人一絲不掛,條條fing示眾🥶😩,可想而知,唔少人嘅情緒谷到一個點🔥,隨時爆發。 唉!可以做D乜?我呢D廢中只可以自求多福🧧,適當時間,咪搵D嘢氹吓自己,減吓壓咁囉😰。 喺大家咁繃緊嘅情緒下,呢間cafe「屋子UCHI 」嘅setting可能可以提供一種恬靜、釋懷嘅感覺俾你🙏。 屋子UCHI cafe (將軍澳唐俊街23號Monterey Place地下16號舖) 有別於其他cafe,呢間堅大👀,有3000呎,空間感十足,走日式無印風,淺白嘅色系、木同藤嘅家具,再配埋榻榻米同屋頂嘅設計,好有「家」嘅感覺,成個氣氛相當舒服😌,疫情之下,就算你喺呢度堂食,都會食得安心D💪。 當日點咗3樣嘢~ 1)黑芝麻Latte, 2)壽喜燒牛肉烏龍麵, 3)草莓雪山吉士小鬆餅。 👆黑芝麻Latte ($50) 假如你係芝麻控,呢個Latte值得一試😍。 賣相骨子,白色嘅奶泡沫、啡色嘅咖啡同灰色嘅芝麻層次分明,打卡一流📷;飲落口嗰吓👅,芝麻同咖啡味道好夾,芬香撲鼻,口感醇厚👍。 👆壽喜燒牛肉烏龍麵 ($98) 咩係壽喜燒?睇吓呢條link啦😎。 https://zh.wikipedia.org/wiki/%E5%A3%BD%E5%96%9C%E7%87%92 對比「屋子」嘅飲品同甜品,個「主食」只係「不過不失」,即使網上面吹到呢個壽喜燒牛肉定食係「必吃之選」,喂❗️我又真係搵唔到個「驚喜點」喔😵💫。 個portion、料嘅豐富度同味道係OK嘅,但牛肉同烏龍麵嘅質素只係一般貨色,我仲會略嫌$98有D貴添😅。 👆草莓雪山吉士小鬆餅 ($82) 嚟到甜品,擺明係貴㗎啦😵💫,嘩!要$82⚡️,不過,又真係幾好食喔🤪💪。 呢隻甜品其實係荷蘭小鬆餅,texture同香港嘅雞蛋仔或者台灣嘅雞蛋糕幾相似。 「屋子」呢個特色甜品做得出色,小鬆餅嘅外皮香脆、蛋味濃濃,而內裏鬆軟,吹彈可破🤣,個士多啤梨醬汁調得好好味🈵️,甜同酸嘅比例精準,每一啖小鬆餅配上個醬汁,醒神開胃,閃電一樣就成個甜品「隊」晒💪🤣,咁就無咗$82啦😭。 我當日好慶幸喺「屋子」渡過咗一個寧靜嘅下午(唔太多客),食完之後,仲去咗cafe附近嘅將軍澳海濱公園行咗一轉,吸吓新鮮空氣,心曠神怡🌞。 寄語大家,疫情之下,多多減壓☘️,好好生活💪。 https://www.facebook.com/uchicoffee/ (完)